Baydén hökümiti xitay bilen bolghan sodida trampning qoralini ishqa sélishi mumkinlikining signalini bergen

Baydén hökümiti amérikaning xitay bilen bolghan jiddiy munasiwetlirige qarita sükütini buzup, xitayning sabiq prézidént tramp bilen imzalighan soda kélishimidiki wedilirini orundishi üchün téximu qattiq bésim ishlitishke teyyarliq qilmaqtiken. Baydén hökümitining emeldarliri hökümetning bu istiratégiyesini 4-öktebir amérika soda wekili ketérin tay washin'gtondiki xelq'ara we istratégiye tetqiqat merkizide nutuq sözlep, amérikaning xitay bilen bolghan soda istiratégiyesini sherhileshning aldida muxbirlargha éytqan.

“Los-anzhilés waqti” ning xewer qilishiche, amérika soda wekili ketérin tay nutqida xitayning soda siyasiti amérika ishchilirigha we sana'itige qandaq ziyanlarni élip kéliwatqanliqini tepsiliy chüshendürgen shundaqla uning sabiq prézidént tramp bilen imzalighan xitay iqtisadini islah qilish wedisige emel qilmighanliqini éytqan. U “Eger xitay özgerse biz qarshi alimiz, biraq biz uning ‍özgirishini kütmeymiz” dégen.

Baydén hökümet emeldarlirining éytishiche, ular bir ay waqit serp qilip, amérika-xitay soda munasiwetlirini qayta körüp chiqqandin kéyin, xitayning dölet karxanilirini qollash, chet'el riqabetchilirini ajizlitish, bazargha tosuq qoyushni öz ichige alghan iqtisadi pa'aliyetlirining amérikaning bu jehettiki négizlik endishilirige qana'etlinerlik jawab bermeydighanliq xulasisini chiqarghan.

“Los-anzhilés waqti” ning qeyt qilishiche, ketérin tay, amérikaning buninggha qarita qandaq konkrét tedbirlerni alidighanliqini éytmighan bolsimu, biraq baydén hökümet emeldarliri hökümetning xitay bilen bolghan soda ‍ixtilapida sabiq prézidént trampning qoralini ishqa sélishi mumkinliki, yeni tamozhna béji qoyushi mumkinlikining bésharitini bergen.