Статистика нәтиҗисидин хитайдики көпчиликниң америкини әң зор тәһдит қарайдиғанлиқи мәлум болған

Мухбиримиз ирадә
2016-10-06
Share

Америкидики мустәқил тәтқиқат оргини болған “пев тәтқиқат мәркизи” чаршәнбә күни хитай һәққидә елан қилған бир статистикидин мәлум болушичә, хитайдики көп қисим киши америкини “ислам дөлити тәшкилати” динму зор хәвп дәп қарайдикән.

Юқиридики бу нәтиҗә, пев тәтқиқат мәркизиниң бу йил әтияз пәслидә хитайдики һәрқайси өлкә, шәһәрләрдә 3000 дин ошуқ кишиниң райини синаш нәтиҗисидә тәйярланған доклатта тилға елинған. Доклатта ейтилишичә, рай синашқа қатнашқанларниң 71 пирсәнти “хитай чәтәлләрниң тәсиригә учраштин һәзәр әйлиши керәк” дәп ойлайдикән вә уларниң йерими дегүдәк америкини хитай үчүн йәр шари килиматидики өзгириш, иқтисадий давалғушлар, хаккирлиқ һуҗумлири вә ислам дөлити тәшкилатлиридинму зор хәвп қарайдикән.

Мәзкур тәтқиқат оргининиң тәтқиқатчиси брус човк “лос анҗелис вақти гезити”гә қилған сөзидә “мән хитай җәмийитидики бу қарашқа немә дәп изаһат беришни биләлмидим, бирақ мәнчә бу диққәт қилишқа тегишлик бир мәсилә” дегән.

Лос анҗелис вақти гезити хәвиридә, ши җинпиң һакимийәткә кәлгәндин буян униң чирик әмәлдарларға зәрбә берип, өктичиләрни җимиқтурғанлиқини вә һәм шундақла шәрқий вә җәнубий деңиздики игилик һоқуқ дәвалиридиму өзиниңкини раст дәйдиған кәскин позитсийидә болғанлиқини, әң муһими униң “чәтәл дүшмән күчлири” дегән ибарини көпләп қоллинип, өктичи һәрикәтләр болсун, хоңкоңдики намайиш вә яки иқтисадтики двалғуш болсун, компартийиниң барлиқ әйиблирини аталмиш “чәтәл дүшмән күчлири” гә артип қоюватқанлиқини билдүргән.

Доклатта әскәртилишичә, рай синашқа қатнаштурулған өлкиләр уйғур ели, тибәт, макав вә хоңкоңни өз ичигә алмайдикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт