Statistika netijisidin xitaydiki köpchilikning amérikini eng zor tehdit qaraydighanliqi melum bolghan

Muxbirimiz irade
2016-10-06
Share

Amérikidiki musteqil tetqiqat orgini bolghan “Péw tetqiqat merkizi” charshenbe küni xitay heqqide élan qilghan bir statistikidin melum bolushiche, xitaydiki köp qisim kishi amérikini “Islam döliti teshkilati” dinmu zor xewp dep qaraydiken.

Yuqiridiki bu netije, péw tetqiqat merkizining bu yil etiyaz peslide xitaydiki herqaysi ölke, sheherlerde 3000 din oshuq kishining rayini sinash netijiside teyyarlan'ghan doklatta tilgha élin'ghan. Doklatta éytilishiche, ray sinashqa qatnashqanlarning 71 pirsenti “Xitay chet'ellerning tesirige uchrashtin hezer eylishi kérek” dep oylaydiken we ularning yérimi dégüdek amérikini xitay üchün yer shari kilimatidiki özgirish, iqtisadiy dawalghushlar, xakkirliq hujumliri we islam döliti teshkilatliridinmu zor xewp qaraydiken.

Mezkur tetqiqat orginining tetqiqatchisi brus chowk “Los anjélis waqti géziti”ge qilghan sözide “Men xitay jem'iyitidiki bu qarashqa néme dep izahat bérishni bilelmidim, biraq menche bu diqqet qilishqa tégishlik bir mesile” dégen.

Los anjélis waqti géziti xewiride, shi jinping hakimiyetke kelgendin buyan uning chirik emeldarlargha zerbe bérip, öktichilerni jimiqturghanliqini we hem shundaqla sherqiy we jenubiy déngizdiki igilik hoquq dewaliridimu öziningkini rast deydighan keskin pozitsiyide bolghanliqini, eng muhimi uning “Chet'el düshmen küchliri” dégen ibarini köplep qollinip, öktichi heriketler bolsun, xongkongdiki namayish we yaki iqtisadtiki dwalghush bolsun, kompartiyining barliq eyiblirini atalmish “Chet'el düshmen küchliri” ge artip qoyuwatqanliqini bildürgen.

Doklatta eskertilishiche, ray sinashqa qatnashturulghan ölkiler Uyghur éli, tibet, makaw we xongkongni öz ichige almaydiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet