Xitay amérikining “11-Séntebir qanuni” gha qarshi chiqti

Muxbirimiz erkin
2016-10-10
Share

Xitay tashqi ishlar ministirliqi düshenbe küni amérika dölet mejlisining yéqinda maqullighan “11‏-Séntebir qanuni” gha qarshi chiqirip, döletlerning ichki qanuni xelq'ara qanun we térrorluqqa qarshi hemkarliqning üstige qoyulmasliqini kéreklikini bildürdi.

Amérika dölet mejlisi 28‏-séntebir bir qanun layihesi maqullighan. Bu qanunda 2001‏-yildiki “11‏‏-Séntebir weqesi” de qurban bolghan amérikiliqlarning a'ile-tawabi'atlirining se'üdi erebistan hökümitini amérika sotigha erz qilishining yoli échip bérilgen idi.

Roytérs agéntliqining xewer qilishiche, xitay tashqi ishlar ministirliqi bayanatchisi géng shu'ang, düshenbe küni térrorluqning barliq shekillirige qarshi turidighanliqini bildürüp, biraq “Xitay xelq'ara térrorluqqa qarshi hemkarliq.........Xelq'ara qanun, xelq'ara munasiwetlerning prinsipi, xususen döletlerning igilik hoquqtiki tüp barawerlik prinsipigha hörmet qilishi kérek, dep qaraydu” dégen.

Amérika prézidénti barak obama ilgiri bu qanun'gha qarshi chiqqan. U, bu qanunning bashqilargha xata ülge tiklep bérip, amérika bixeterliki we dölet menpe'etige ziyanliq aqiwetlerni élip kélidighanliqini ilgiri sürgen. Shunga u, amérika dölet mejlisi bu qanunni 1‏-qétim maqullap, uning testiqigha sun'ghanda testiqlashni ret qilghan idi.

Emma dölet mejlisi 28‏-séntebir 2‏-qétim awazgha qoyghan. Bu qétim mejlis ezalirining 3 den 2 qismi qanun layihesini qollap awaz bergen. Netijide, bu layihe prézidéntning testiqisiz qanun'gha aylan'ghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet