Amérika awam palata ezasi amérika uniwérsitétlirida xitayning tesirini yoqitish pilanini tonushturghan

Amérika awam palatasining jumhuriyetchiler partiyesidin bolghan ezasi mayk gallagér xitayning amérika uniwérsitétliridiki tesirini azaytish heqqide 5 qisimliq pilan otturigha qoyghan.

Amérikadiki “Uniwérsitét xewerliri” torining xewiridin melum bolushiche, mayk gallagér amérika uniwérsitétlirini xitay bilen amérika otturisidiki “Yéngi soghuq urushning eng muhim jeng meydanlirining biri” dégen. U wiskanson shitatliq mejliste uniwérsitétlar we téxnika sahesi heqqidiki guwahliq yighinida qilghan sözide amérika uniwérsitétlirining xitay bilen hemkarliqining xeterlik derijige yetkenlikini eskertip, munularni dégen:

“Nöwettiki weziyet sijil emes-bizdek ulugh bir dölet bizning eng chong düshminimizning tesiridin qutulushi kérek. Amérika uniwérsitétliri we karxaniliri öz döliti terepte turamdu yaki bizning turmush usulimizni buzushni niyet qilghan, irqiy qirghinchiliq bilen shughulliniwatqan bir kommunist hakimiyet terepte turamdu? buninggha qarar bérishi kérek. Biz hergiz ulargha oxshash bir xil idiyeni algha sürüsh we yuqiri téxnikaliq nazaret yoligha mangmasliqimiz kérek”.

U uniwérsitit da'irilirining xitay salghan mebleghqe tayinip qéliwatqanliqini, shunga ularning qararliriningmu bu hökümetning tesirige uchrawatqanliqini éytip, mundaq dégen:

“Biz dölet miqyasida her ikki partiye ezalirining qétilishi bilen kungzi inistitutlirini chekliduq. Emma bezi uniwérsitétlar fédéral cheklesh buyruqidin qutulush üchün derhal mektepliridiki kungzi institutlirining isimlirini özgertipla pa'aliyetlirini dawam qildurmaqta. Bu uniwérsitétlar yene herxil namlar astida xitay kommunistliridin pul we sowghat almaqta.”

Dölet mejlis ezasi mayk gallagér sözide amérika unwérsitétiliridiki mana mushu xil weziyetke xatime bérish üchün choqum aldi bilen mekteplerning fond mesilisini hel qilish, yéngi qanun-nizamlarni belgilesh, xitay oqughuchilar we ularning nazuk tetqiqat türlirige qatnishishini tengshesh qatarliq 5 qisimliq pilanni tonushturup ötken.

U shu kündiki sözide yene xitayning Uyghurlargha qiliwatqan irqiy qirghinchiliqi heqqidimu toxtilip: “Xitayni bu adem ishen'güsiz herikettin toxtitishning yoli uning iqtisadiy menbesini üzüshtur. Amérika aliy mektepliri xitay bilen hemkarliqini toxtitishi؛ döletlik, shitatliq we yerlik pénsiye fondlirini xitay shirketliridin chékindürüp chiqishi kérek,” dégen.