Mayk pompyo: “Amérika xitayning parixorluq impériyesige qarshi küresh qilidu”

Amérika tashqi ishlar ministiri mark pompyo 26‏-öktebir xitayning bashqa dölet rehberlirige “Para bérish” we meblegh sélish arqiliq bir impériye qurmaqchi boluwatqanliqini agahlandurup, amérikining buninggha qarshi küresh qilidighanliqini bildürgen.

Amérika tereqqiy qiliwatqan döletlerni, bolupmu latin amérikisidiki döletlerni xitayning meblighidin hoshyar bolushqa agahlandurup kelmekte.

Firansiye agéntliqining xewer qilishiche, mayk pompyo yuqiriqi sözni amérikidiki bir konsérwatip radiyo istansisining riyasetchisi xyu xewétning ziyaritini qobul qilghanda éytqan.

U amérikining “Xitay bilen adil we barawer soda riqabiti élip bérishni qarshi alidighanliqi” ni eskertip, “Xitayning bashqa döletlerdiki yuqiri derijilik emeldarlargha para bérip, buning bedilige qurulush toxtamlirini élishi emeliyette shu döletning xelqige ziyanliq. Parigha tayan'ghan bu xil impériye qurulushi bu döletlerge paydisiz,” dégen.

Mayk pompyoning ilgiri sürüshiche, xitayning bu xil iqtisadi pa'aliyiti elwette amérikining menpe'eti üchün xewplik bolup, amérika uninggha her jehettin qarshi turidiken. Amérika hökümet emeldarliri ilgiri latin amérikisi, afriqa we asiyadiki bezi döletlerni xitayning meblighi we qerzidin hezer eyleshke agahlandurghan, ularning bu qerzni qayturushta qiynilidighanliqi, netijide bezi ul eslihelirini xitaygha ötküzüp bérishke mejbur bolidighanliqini tekitlep kelgen idi.

Pompyo bu sözni amérika-xitay soda urushi taza ötkürleshken mezgilde qilghan. “Wol-strét zhurnili” gézitining ashkarilishiche, xitay terep yéqinda amérika bilen soda söhbitini eslige keltürüshni telep qilghan bolsimu, lékin amérikining mu'awin maliye ministiri deywid malpas xitay terep amérika karxanilirini téxnika ötünüp bérishke qistashtin waz kechmigüche we konkrét bir iqtisadi pilanni otturigha qoymighiche söhbet ötküzüshni ret qilghan.