Хитай уйғур елидә америка һәрбий парахотлириниң тәқлидини ясап, башқурулидиған бомба һуҗум мәшиқи елип барған

Мухбиримиз әркин
2021-11-08
Share

Хитайниң башқурулидиған бомба мәшиқ базиси болған уйғур елидә, америка деңиз армийәсиниң авиаматкилири вә башқа уруш парахотлириниң тәқлидини ясап һуҗум мәшиқи елип бериватқанлиқи мәлум болған. Ройтерс агентлиқиниң билдүрүшичә, хитайниң бу һәрикити униң хитайниң америка билән болған тәйвән, җәнубий деңиз мәсилилиридики ихтилапи өткүрлишип кәткән бир пәйттә, авиаматкиға қарши туруш иқтидарини һазирлаватқанлиқниң ипадиси икән.

Мәлум болушичә, бу тәқлиди әслиһәләр чәрчән наһийәсиниң мәлум бир җайида қурулған болуп, бу орун хитайниң балистик башқурулидиған бомба синиқиға ишлитилип кәлгәникән. Ройтерсниң ейтишичә, мәзкур мәшиқ базисини америкадики “барлиқ мәнбәләр анализи” намлиқ бир җуғрапийә истихбарат ширкити сүний һәмраһидин байқиған. Сүний һәмраһ сүрәтлиридин тәклимакан қумлуқидики бу мәшиқ базисида бир америка авиаматкисиниң толуқ тәқлиди, шундақла американиң “арлей бурк” дәриҗилик аз дегәндә икки башқурулидиған бомба парахотиниң тәқлидиниң ясалғанлиқи, парахотларниң тәқлиди 6 метир кәңликтики төмүрйол релисиниң үстигә қурулғанлиқи мәлум болған.

Хитай американиң авиаматка вә уруш парахотлириға қарши “шәрқ-шамили 21” намлиқ балистик башқурулидиған бомба системиси тәрәққий қилдурған. Америка дөләт мудапиә министирлиқиниң доклатида ейтилишичә, хитай парахотқа қарши бу хил балистик башқурулидиған бомбилириниң раст оқ синиқини тунҗи қетим 2021-йили 7-айда җәнубий деңиздики спрател тақим араллириниң шималида елип барғаникән.

Уйғур ели 1960-йиллардин бери изчил хитайниң синақ базиси болуп кәлди. У илгири бу районни ядро синақ базиси қилған. 2017-Йили башланған чоң тутқунда у өзиниң юқири техникилиқ назарәт системисини синақ қилғаниди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт