Amérika xitayning tesirini azaytish meqset qilin'ghan lobito tömür yol qurulushigha meblegh salghan

Amérika pirézidénti jo baydin 4-dékabir charshenbe küni, an'golaning lobito portida afriqa döletliri rehberliri bilen körüshken. Uning bu uchrishishta, kon'go we zambiyediki istratégiyelik minéral maddilarni lobito porti arqiliq gherbke yetküzidighan tömür yol qurulushini kéngeytish pilanini ilgiri sürgenliki melum.

“Roytérs agéntliqi” ning xewer qilishiche, bu tömür yol qurulushi amérika hökümitining xitayning rayondiki tesirini azaytish tirishchanliqlirining biri iken. Xitay kon'go démokratik jumhuriyitining kanchiliq saheside aktip heriket qiliwatqan bolup, bu kanlar bataréye we bashqa sana'et zapchasliri üchün intayin muhim dep qaralghan minéral maddilarni éksport qilidiken.

Amérika bu minéral maddilarni gherbke toshuydighan lobito tömür yol qurulushini qollash üchün 550 milyon dollar meblegh salghan bolup, bu an'goladiki bar bolghan tömür yolni yéngilash we uni birinchi basquchning bir qismi süpitide kon'goning kan merkizige kéngeytishni öz ichige alidiken.

“Roytérs agéntliqi” ning déyishiche, xitayning kon'goning mis we kobalt zapisini öz ichige alghan halqiliq minéral maddilarni kontrol qilishi amérikaning küchlük diqqitini qozghawatqan bir peytte, lobito atlantik okyan tömür yoli qurulushining 2022-yili gherb shirketliri birleshmisige bérilishi, xitayning tesirige qarshi turushtiki bir ghelibe, dep qaralghan.

Aqsarayning bayanatigha qarighanda, pirézidént jow baydén bilen kon'go pirézidénti féliks tshékédi ikki döletning meblegh sélish we tinchliqni ilgiri sürüsh wedisini mu'eyyenleshtürgen we lobito türi heqqide söhbetleshken. Bu türning ikkinchi basquchida lobito karidori tömür yolini zambiyedin uzartip, tanzaniyening hindi okyan'gha chiqidighan darussalam portigha tutashturush közde tutulghan.