Хитай америкиниң хитайни “рәқиб” дәп елан қилишиға қарита һәмкарлиқни тәкитлиди

Мухбиримиз әркин
2017.12.19

Америка һөкүмити дүшәнбә күни өзиниң дөләт хәвпсизлик истратегийәсини елан қилип, хитайни “рәқиб” дәп елан қилғандин кейин хитай сәйшәнбә күни баянат елан қилип, өз ара қаршилишишниң һәр икки дөләткә пайда әкәлмәйдиғанлиқини билдүргән.

Хитайниң америкидики әлчиханиси өзиниң торида елан қилған баянатида, һәмкарлиқ һәр икки дөләтниң мәнпәәтигә пайдилиқ икәнлики, америкиниң пайдисиз тәпәккур усулини ташлап, ортақ мәнпәәт асасида пәрқлиқләргә һөрмәт қилиши керәкликини тәкитлигән.

Трамп һөкүмити дүшәнбә күни елан қилған дөләт хәвпсизлик истратегийәсидә хитайни һәрбий, иқтисади җәһәттики “рәқиб дөләт” дәп бекитип, униң һазирқи хәлқара мәвҗут һаләтни өзгәртишкә урунуватқанлиқини билдүргән. Униңда йәнә хитайниң җәнубий деңизни һәрбийләштүрүши арқилиқ бу районниң муқимлиқиға бузғунчилиқ қиливатқанлиқи агаһландурулуп, униң һәр йили америкиниң бир милярд долларлиқ әқлий мүлүк һоқуқини оғрилаватқанлиқи оттуриға қоюлған. Америка дөләт хәвпсизлик истратегийәсидә йәнә, хитайниң америкини һинди-тинч окян районидин сиқип чиқирип, өзиниң дөләт контроллуқидики иқтисади моделини кеңәйтишкә, районда өзигә пайдилиқ тәртип орнитишқа урунуватқанлиқи тәкитләнгән иди.

Лекин хитайниң америкидики әлчиханиси баянатида, хитайниң америкини өз ичигә алған барлиқ дөләтләр билән “өз ара һөрмәт қилиш асасидики тинчлиқта биргә турушни халайдиғанлиқи”ни билдүрүп, “бирақ америка хитайниң тәрәққиятини етирап қилиши вә қобул қилиши керәк”ликини тәкитлигән. Ройтерс агентлиқиниң хәвәр қилишичә, шу күни хитай ташқи ишлар министирлиқи баянатчиси хуа чүнйиң, һәмкарлиқ хитай билән америкиниң бирдин-бир таллаш йоли икәнлики, икки тәрәп оттуридики ихтилапни һәл қилишниң иҗабий йолини тепип чиқиши керәкликини билдүргән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.