Америка дөләт мәҗлиси әзалири һөкүмәтниң һоқуқини күчәйтип, америка ширкәтлириниң хитайға мәбләғ селишини чәклимәкчи болған

Мухбиримиз җәвлан
2022.06.14

Америка дөләт мәҗлиси әзалири қанун лайиһәси түзүп, американиң хитайға техника саһәлиридә мәбләғ селишиға чәклимә қоюп, мал тәминләш зәнҗирини қайта бәрпа қилмақчи болған.

“вал ситерт журнили” ториниң хәвәр қилишичә, америка дөләт мәҗлиси әзалири һазир хитайға мәбләғ селишқа мунасивәтлик бир йеңи қанун лайиһәси түзүватқан болуп, бу қанун кәлгүсидә америка ширкәтлириниң чәтәлгә мәбләғ селиш қаидә-түзүмини өзгәртидикән; дөләт мәҗлиси әзалири йәнә хитайни рәқиб дөләт қатарида көрүп, хитайға селинидиған мәбләғни тәкшүрүш, шу арқилиқ американиң техникисини қоғдап, мал тәминләш линийәси қайта бәрпа қилиш һәққидә тәклипләр сунған.

Америка дөләт мәҗлисиниң билдүрүшичә, бу қанун лайиһәси американиң хитайға қарши риқабәт күчини ашурушқа мунасивәтлик қанунлардин икән. Бу қанун лайиһәсидә америка ширкәтлири вә мәбләғ салғучиларниң чәтәлгә мәбләғ селиш пиланини мәлум қилиши тәләп қилинған; шундақла мәмурий органларға бөлүм һалқиған алаһидә гуруппа қуруп, униңға дөләт хәвпсизлики үчүн мәбләғ тәкшүрүш вә мәбләғ селишни тосуш һоқуқи бериш оттуриға қоюлған.

Бу қанун лайиһәсидә көрситилишичә, мал тәминләш линийәсидики муһим карханилар, ширкәтләр вә уларниң тармақлири хитайдики сода паалийити һәққидә америка һөкүмитигә мәлумат бериши керәк икән. Йеңидин гүлләнгән һалқилиқ техникилардин йерим өткүзгүч, юқири сиғимлиқ батарейә, доригәрлик, био-техника, әқлий иқтидар, квантумлуқ һесаблаш, пул-муамилә техникиси қатарлиқ саһәләрдә мәбләғ селишта қаттиқ тәкшүрүштин өтүш, дөләт хәвпсизликигә четилидиған йери болса мәбләғ селишни дәрһал тохтитиш тәләп қилинидикән.

Мәлум болушичә, қиммити нәччә миң милярд долларға йетидиған юқири техника мәһсулатлириға мәбләғ селишқа мунасивәтлик бу қанун лайиһәсини түзүш үчүн америка дөләт мәҗлиси әзалириниң төттин бир қисми кәскин муназирә вә музакириләргә қатнашқан.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.