Америка-хитай мунасивәтлириниң совушқа башлиғанлиқи илгири сүрүлмәктә

Мухбиримиз җүмә
2017-07-01
Елхәт
Пикир
Share
Принт

Америка-хитай мунасивәтлиридә бу йилниң бешида көрүлгән қизғинлиқиниң совушқа башлиғанлиқи, америкиниң хитай сияситини қарши йөлинишкә бураватқанлиқи илгири сүрүлмәктә. Бу қарашлар 30-июн америкидики нопузлуқ хәвәр қанили с н н дә елан қилған бир мулаһизидә оттуриға қоюлди.

Мақалидә америка-хитай мунасивәтлиридики чекинишиниң мисали сүпитидә, америкиниң хитайни адәм әткәсчилик мәсилиси әң еғир дөләт қатариға тизғанлиқи, тәйвәнгә 1 милярд 400 милйон доллар қиммитидики қорал-ярақ сетип беришини тәстиқлиғанлиқи вә шималий корейә билән сода қилған бир хитай банкисиға иқтисадий чәклимә елан қилғанлиқи қатарлиқлар оттуриға қоюлған. Мақалидә президент доналд трампниң хитай рәиси ши җинпиң билән бу йил учрашқандин буян дәриҗидин ташқири қизғин мунасивәтни сақлап кәлгәнлики, америкиниң шималий корейәни тизгинләш үчүн җәнубий деңиз мәсилиси қатарлиқларда хитайға қаритилған бесимни юмшатқанлиқи тилған елинған. Мақалидә мундақ көрситилгән: «һалбуки 21-июн трамп твиттерда бир учур елан қилип, хитайниң шималий корейәни тизгинләш тиришчанлиқиниң карға кәлмигәнликини, әмма уларниң буниң үчүн көрсәткән тиришчанлиқидин миннәтдар икәнликини билдүрди.»

Мақалидә нәқил қилишичә, юқириқи аламәтләр һәққидә тохталған седний лавй институтидики хәлқара хәвпсизлик программисиниң директори еуан граһам мундақ дегән: «болупму бу твиттер учури маралагодики алий дәриҗиликләр учришидин кейинки шерин айниң аяғлашқанлиқиниң күчлүк ипадиси. Бу йәнә хитай-америка мунасивәтлиридә өзгириш болидиғанлиқи вә қизғинлиқниң төвәнләйдиғанлиқиниң бәлгиси.»

Америка президенти доналд трамп хитай рәиси ши җинпиң бу йил 6-апрел флорида штатидики язлиқ туралғуси - маралагода күтүвалған. Шундин кейин икки тәрәп арисида алаһидә яхши мунасивәт давам қилған иди. Һалбуки, бу бир һәптә ичидә америка даирилири хитайни адәм әткәсчилик мәсилиси әң еғир дөләт тизимликигә киргүзүпла қалмай, президент трамп пәйшәнбә күни  тәйвәнгә 1 милярд 400 милйон доллар қиммитидики һәрбий қорал ярақларни сетип беришини тәстиқлиған иди. Бу қарар тәйвән даирилириниң қизғин қариши елишиға еришкән болсиму, хитайниң интайин күчлүк наразилиқини қозғиған.

Хитай ташиқи ишлар министирлиқи баянатчиси җүмә күнидики баянатида америкини мәзкур содини бикар қилишқа чақирған вә буниң америка-хитай мунасивәтлиригә зиян йәткүзидиғанлиқини билдүргән.Униңдин башқа америка малийә министирлиқи җүмә күни алған қарарида хитайниң бир мал транспорт ширкити, икки  хитай содигири вә дәндоң банкисиға иқтисадий җаза қойғанлиқини җакарлиған.
Америка малийә министири стевин мнучин бу һәқтики баянатида юқиридики банка вә шәхсләрниң шималий корейәниң ядур қораллири программисиға һәмдәмдә болғанлиқини билдүргән.Мақалидә оттуриға қоюлушичә, америкиниң юқириқи қарари шималий корейә мәсилисини һәл қилиш үчүн америкиниң һәрқандақ шәкилдә бесим ишлитишкә тәйяр икәнликини көрситидикән.

Пикирләр (0)
Share
Толуқ бәт