Amérika-xitay munasiwetlirining sowushqa bashlighanliqi ilgiri sürülmekte

Muxbirimiz jüme
2017-07-01
Élxet
Pikir
Share
Print

Amérika-xitay munasiwetliride bu yilning béshida körülgen qizghinliqining sowushqa bashlighanliqi, amérikining xitay siyasitini qarshi yölinishke burawatqanliqi ilgiri sürülmekte. Bu qarashlar 30-iyun amérikidiki nopuzluq xewer qanili s n n de élan qilghan bir mulahizide otturigha qoyuldi.

Maqalide amérika-xitay munasiwetliridiki chékinishining misali süpitide, amérikining xitayni adem etkeschilik mesilisi eng éghir dölet qatarigha tizghanliqi, teywen'ge 1 milyard 400 milyon dollar qimmitidiki qoral-yaraq sétip bérishini testiqlighanliqi we shimaliy koréye bilen soda qilghan bir xitay bankisigha iqtisadiy cheklime élan qilghanliqi qatarliqlar otturigha qoyulghan. Maqalide prézidént donald trampning xitay re'isi shi jinping bilen bu yil uchrashqandin buyan derijidin tashqiri qizghin munasiwetni saqlap kelgenliki, amérikining shimaliy koréyeni tizginlesh üchün jenubiy déngiz mesilisi qatarliqlarda xitaygha qaritilghan bésimni yumshatqanliqi tilghan élin'ghan. Maqalide mundaq körsitilgen: "Halbuki 21-iyun tramp twittérda bir uchur élan qilip, xitayning shimaliy koréyeni tizginlesh tirishchanliqining kargha kelmigenlikini, emma ularning buning üchün körsetken tirishchanliqidin minnetdar ikenlikini bildürdi."

Maqalide neqil qilishiche, yuqiriqi alametler heqqide toxtalghan sédniy lawy institutidiki xelq'ara xewpsizlik programmisining diréktori é'u'an graham mundaq dégen: "Bolupmu bu twittér uchuri mar'alagodiki aliy derijilikler uchrishidin kéyinki shérin ayning ayaghlashqanliqining küchlük ipadisi. Bu yene xitay-amérika munasiwetliride özgirish bolidighanliqi we qizghinliqning töwenleydighanliqining belgisi."

Amérika prézidénti donald tramp xitay re'isi shi jinping bu yil 6-aprél florida shtatidiki yazliq turalghusi - mar'alagoda kütüwalghan. Shundin kéyin ikki terep arisida alahide yaxshi munasiwet dawam qilghan idi. Halbuki, bu bir hepte ichide amérika da'iriliri xitayni adem etkeschilik mesilisi eng éghir dölet tizimlikige kirgüzüpla qalmay, prézidént tramp peyshenbe küni  teywen'ge 1 milyard 400 milyon dollar qimmitidiki herbiy qoral yaraqlarni sétip bérishini testiqlighan idi. Bu qarar teywen da'irilirining qizghin qarishi élishigha érishken bolsimu, xitayning intayin küchlük naraziliqini qozghighan.

Xitay tashiqi ishlar ministirliqi bayanatchisi jüme künidiki bayanatida amérikini mezkur sodini bikar qilishqa chaqirghan we buning amérika-xitay munasiwetlirige ziyan yetküzidighanliqini bildürgen.Uningdin bashqa amérika maliye ministirliqi jüme küni alghan qararida xitayning bir mal transport shirkiti, ikki  xitay sodigiri we dendong bankisigha iqtisadiy jaza qoyghanliqini jakarlighan.
Amérika maliye ministiri stéwin mnuchin bu heqtiki bayanatida yuqiridiki banka we shexslerning shimaliy koréyening yadur qoralliri programmisigha hemdemde bolghanliqini bildürgen.Maqalide otturigha qoyulushiche, amérikining yuqiriqi qarari shimaliy koréye mesilisini hel qilish üchün amérikining herqandaq shekilde bésim ishlitishke teyyar ikenlikini körsitidiken.

Toluq bet