Америка полат гуруһи америка һөкүмитидин хитай полат ширкитиниң америкида полат сетишини чәкләшни тәләп қилған

Мухбиримиз җүмә
2016.05.01

Америка полат гуруһи америка һөкүмитигә илтиҗа қилип, хитай полат ширкитиниң 2010 - йилидики тор һуҗумида өз ширкити йиллап тәтқиқ қилип чиққан техника мәхпийәтликини оғрилап кәткәнликини, шуңа уларниң америкида полат сетишини чәкләшни тәләп қилған.

“чикаго мунбири” гезитиниң хәвәр қилишичә, әгәр бу ширкәтниң әрзи еқип қалса, хитайниң америкиға карбон вә бирикмә полат мәһсулати експорт қилишиға хатимә берилидикән.

Хәвәрдә нәқил қилишичә, америка полат гуруһиниң вакаләтчиликини қиливатқан кувин емануел адвокатлиқ орнидики дәбий шон хитай һәққидә тохтилип: “улар бизниң бүгүнимизни өзиниң қиливелишқа аллибурун урунуп болди, әмдиликтә кәлгүсимизгә қол созмақта” дегән.

Һалбуки, хитай сода санаәт министирлиқи өз торбетигә елан қилған баянатида, юқириқиларни “асассиз” дәп рәт қилған һәмдә улар америка һөкүмитиниң америка порт гуруһиниң әрзни рәт қилишни, икки тәрәп полат ширкәтлириниң мәсилини сөһбәтлишиш йоли билән һәл қилишини үмид қилидиғанлиқини билдүргән.

Мәлум болушичә, америкиниң питтсбуг шәһиригә җайлашқан мәзкур ширкәт икки йил аввал хитай тор бузарлириниң һуҗумиға учриғанлиқини билдүргән.

Америка һөкүмити әйни йили 5 нәпәр хитай һәрбий офитсерини америкиниң һәрбий вә сода мәхпийәтликни оғрилаш җинайити билән әйиблигән вә һуҗумға учриған ширкәтләр арисида америка полат гуруһиму барлиқини билдүргән иди.

Һалбуки, хитай буниму “асассиз” дәп рәт қилған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.