Amérika polat guruhi amérika hökümitidin xitay polat shirkitining amérikida polat sétishini chekleshni telep qilghan
2016.05.01
Amérika polat guruhi amérika hökümitige iltija qilip, xitay polat shirkitining 2010 - yilidiki tor hujumida öz shirkiti yillap tetqiq qilip chiqqan téxnika mexpiyetlikini oghrilap ketkenlikini, shunga ularning amérikida polat sétishini chekleshni telep qilghan.
“Chikago munbiri” gézitining xewer qilishiche, eger bu shirketning erzi éqip qalsa, xitayning amérikigha karbon we birikme polat mehsulati éksport qilishigha xatime bérilidiken.
Xewerde neqil qilishiche, amérika polat guruhining wakaletchilikini qiliwatqan kuwin émanu'él adwokatliq ornidiki debiy shon xitay heqqide toxtilip: “Ular bizning bügünimizni özining qiliwélishqa alliburun urunup boldi, emdilikte kelgüsimizge qol sozmaqta” dégen.
Halbuki, xitay soda sana'et ministirliqi öz torbétige élan qilghan bayanatida, yuqiriqilarni “Asassiz” dep ret qilghan hemde ular amérika hökümitining amérika port guruhining erzni ret qilishni, ikki terep polat shirketlirining mesilini söhbetlishish yoli bilen hel qilishini ümid qilidighanliqini bildürgen.
Melum bolushiche, amérikining pittsbug shehirige jaylashqan mezkur shirket ikki yil awwal xitay tor buzarlirining hujumigha uchrighanliqini bildürgen.
Amérika hökümiti eyni yili 5 neper xitay herbiy ofitsérini amérikining herbiy we soda mexpiyetlikni oghrilash jinayiti bilen eyibligen we hujumgha uchrighan shirketler arisida amérika polat guruhimu barliqini bildürgen idi.
Halbuki, xitay bunimu “Asassiz” dep ret qilghan.