Bash elchi nikolas burns: amérika-xitay riqabiti qurulma xaraktérlik riqabet

Amérikaning xitayda turushluq bash elchisi nikolas burns amérikaning NBC téléwiziyesige qilghan bir sözide, amérika bilen xitay otturisidiki bu riqabetlik munasiwetning asanliqche ayaghlashmaydighanliqini bildürgen. U sözide, “Amérika xitayning sözige emes, belki uning herikitige qarap höküm qilidu. Biz qurulma xaraktérlik reqiblerdin hésablinimiz. Shunga men bu riqabetni kelgüsi on yilgha sozulidu, dep qaraymen. Biz choqum riqabetlishishimiz kérek” dégen.

Bash elchi nikolas burnis 23-öktebir küni bergen bu mexsus ziyaritide yene, kishilik hoquq mesilisining ikki döletning eng chong perqi hésablinidighanliqini bildürgen. U mundaq dégen:

“Eng chongqur perq shuki, biz insanlarning erkinlikige we kishilik hoquqqa ishinimiz, shunga biz shinjangda, tibette, xongkongda yüz bériwatqan ishlarni hemde diniy étiqad erkinlikidiki yétersizliklerni eyibleymiz.”

Nikolas burns xitayning ukra'ina urushidiki pozitsiyesinimu tenqidlep, “Xitay özini rusiye-ukra'ina urushida biterep deydu, biraq u del eksiche heriket qiliwatidu. Bu bizning munasiwitimizdiki bir chong mesile bolup qaldi” dégen.

 Nikolas burnis yene, xitay istixbarat tarmaqlirining amérika elchixanisi amérikaliqlar bilen xitaylarni uchrashturushni meqset qilip uyushturghan 94 qétimliq pa'aliyetke tosqunluq qilghanliqini, xitay puqralirigha téléfon qilip ulargha pa'aliyetke qatnashmasliq heqqide tehdit salghanliqini éytip, “Xitayning aghzidin chiqqan gep bilen herikiti birdeklikke ige bolushi kérek” dégen.

Nikolas burnis baydén hökümitining xitayning amérikigha élip kélidighan tehditi heqqidiki köz qarishining intayin éniqliqini tekitligen we “Bu intayin murekkep we xirisqa tolghan munasiwet. Amérika üchün éytqanda, bu bashqa herqandaq döletke sélishturghanda aqiwiti éghir bolidighan munasiwet bolup hésablinidu” dégen.