Amérika: "Xitay bilen rusiyening dunya soda teshkilatigha kirishini qollap xata qiliptuq"

Muxbirimiz méhriban
2018-01-19
Share

Amérika hökümiti jüme küni bayanat élan qilip, özining ilgiri xitay bilen rusiyening "Dunya soda teshkilati" gha kirishini qollighanliqining bir chong xataliq bolghanliqini étirap qilghan hemde xitay bilen rusiyening héch zaman bu xelq'araliq teshkilatning shertlirini ada qilish niyitide bolup baqmighanliqini bildürgen.

Amérika soda wekili robért laythizér jüme küni amérika dölet mejlisige sun'ghan doklatida, "Dunyadiki asasliq iqtisadiy küchler özlirining bazarlirini sirtqa échish we adilliq bilen soda qilish niyitining yoqluqi sewebidin xelq'araliq soda sistémisigha tehdit élip kelmekte," dégen. U sözide, "Bundaq qilish dunya soda teshkilatining erkin bazar métodigha mas kelmeydu we bu teshkilatning asasliq prinsiplirigha qarshi," dégen. 

Firansiye agéntliqining xewirige qarighanda, amérikining 2016-yilidiki xitay bilen bolghan sodidiki ziyini 309 milyard dollar bolup, bu ziyan her yili yene 10 milyard dollardin éship mangidighan bolghachqa, amérika prézidénti donald tramp bu soda ziyini sewebidin xitayni iqtisadiy jehettin jazalimaqchi iken. 

Amérika soda wekili robért laythizér sözide yene, "Xitay hökümiti döletning iqtisadtiki yétekchilik rolini dawamlashturush bilen bir waqitta, yene chet'el shirketlirining aldini aktipchanliq bilen tosush arqiliq, ulargha ziyan-zexmet élip kelmekte," dédi. U sözide rusiyenimu eyiblep, "Rusiyeni dunya soda teshkilatigha kirgüzüsh bir xataliq," dédi.

Amérika, xitay hökümitining bergen wedilirige ishinip, uning dunya soda teshkilatigha kirishini qollighanliqi üchün xitay 2001-yili bu xelq'araliq teshkilatqa resmiy eza bolghan idi. Amérika oxshashla rusiyening wedisige ishinip, uning 2012-yili dunya soda teshkilatigha kirishini qollighan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet