Андрув бровне: «америка билән хитай оттурисидики сода уруши йеқинлашмақта!»

Мухбиримиз әзиз
2018-01-16
Елхәт
Пикир
Share
Принт

Хитайниң америка билән болған сода мунасивитидики тәтүр балансниң барғансери зорийиши бир қисим сиясийонларни әндишигә гириптар қиливатқанлиқи мәлум. Болупму бу һал доналд трамп ақ сарайға киргәндин кейин техиму рошәнләшкән. Буниң бир зор ипадиси болса хитайниң америкиға експорт қилидиған маллириға қоюлидиған баҗни ашуруш һәққидики мәсилидә әң рошән әкс әтмәктә икән.

«Вал стрет журнили» ниң 16-январдики саниға бесилған андрув бровне имзасидики мәхсус сәрләвһилик мақалә әнә шу мәсилигә беғишланған.

Мақалида көрситилишичә, америка президенти доналд трампниң «америка биринчи» шоари вә хитай рәиси ши җинпиң оттуриға қойған «хитай чүши» чүшәнчиси икки мәмликәт оттурисидики болғуси сода урушини техиму йеқинлаштуруватқан бир муһим амил икән. Буниң билән хитай америкиға експорт қилидиған санаәт мәһсулатлириниң сани вә миқдари ғайәт зор дәриҗидә ашқан. Америка болса окяндәк ғайәт зор миқдарда еқип келиватқан бу мәһсулатлардин елинидиған таможна беҗини ашурушни тәкитләп кәлгән.

Бу һәқтики мәсилиләр һәққидә мақалә аптори «идеологийә саһәсидики ‹қизғинлиқ' вә кимниң қанчилик ‹дәсми' си барлиқи һәққидики қариму-қарши мөлчәр сәвәбидин сода уруши бәкму йеқинлап қеливатиду» дәп язиду.

Мақалида көрситилишичә, америка президенти доналд трамп изчил һалда «2001-йили хитайни дуня сода тәшкилатиға елип киргәнлики а қ ш ниң әң чоң хаталиқи. Бу һал америкиға йеңи бир рәқибни тәйяр қилди» дәп қарап кәлмәктә икән. Мутәхәссисләрниң пикиригә қариғанда бу қетим икки мәмликәт оттурисида сода уруши партлиса буниң пүткүл йәршари иқтисадиға көрситидиған тәсирини тәсәввур қилиш қийин болидикән. Әмма нөвәттә бу сода уруши растинла партлиса кимниң йеңиши техи ениқ әмәс икән.

Пикирләр (0)
Share
Толуқ бәт