Andruw browné: "Amérika bilen xitay otturisidiki soda urushi yéqinlashmaqta!"

Muxbirimiz eziz
2018-01-16
Élxet
Pikir
Share
Print

Xitayning amérika bilen bolghan soda munasiwitidiki tetür balansning barghanséri zoriyishi bir qisim siyasiyonlarni endishige giriptar qiliwatqanliqi melum. Bolupmu bu hal donald tramp aq saraygha kirgendin kéyin téximu roshenleshken. Buning bir zor ipadisi bolsa xitayning amérikigha éksport qilidighan mallirigha qoyulidighan bajni ashurush heqqidiki mesilide eng roshen eks etmekte iken.

"Wal strét zhurnili" ning 16-yanwardiki sanigha bésilghan andruw browné imzasidiki mexsus serlewhilik maqale ene shu mesilige béghishlan'ghan.

Maqalida körsitilishiche, amérika prézidénti donald trampning "Amérika birinchi" sho'ari we xitay re'isi shi jinping otturigha qoyghan "Xitay chüshi" chüshenchisi ikki memliket otturisidiki bolghusi soda urushini téximu yéqinlashturuwatqan bir muhim amil iken. Buning bilen xitay amérikigha éksport qilidighan sana'et mehsulatlirining sani we miqdari ghayet zor derijide ashqan. Amérika bolsa okyandek ghayet zor miqdarda éqip kéliwatqan bu mehsulatlardin élinidighan tamozhna béjini ashurushni tekitlep kelgen.

Bu heqtiki mesililer heqqide maqale aptori "Idé'ologiye sahesidiki 'qizghinliq' we kimning qanchilik 'desmi' si barliqi heqqidiki qarimu-qarshi mölcher sewebidin soda urushi bekmu yéqinlap qéliwatidu" dep yazidu.

Maqalida körsitilishiche, amérika prézidénti donald tramp izchil halda "2001-Yili xitayni dunya soda teshkilatigha élip kirgenliki a q sh ning eng chong xataliqi. Bu hal amérikigha yéngi bir reqibni teyyar qildi" dep qarap kelmekte iken. Mutexessislerning pikirige qarighanda bu qétim ikki memliket otturisida soda urushi partlisa buning pütkül yershari iqtisadigha körsitidighan tesirini tesewwur qilish qiyin bolidiken. Emma nöwette bu soda urushi rastinla partlisa kimning yéngishi téxi éniq emes iken.

Toluq bet