Хитай һөкүмити: «биз америка билән сода уруши қилишни халимаймиз!»

Мухбиримиз әзиз
2018-03-05
Елхәт
Пикир
Share
Принт

Америка президенти доналд трамп 2-март күни «сода уруши биз үчүн бәкму пайдилиқ. Йәнә келип униңда бизниң утушимиз оюнниң орнидики бир иш» дәп җакарлаш билән биргә хитайдин импорт қилинидиған полат материяллириға 25 пирсәнт, алюмин материяллириға 10 пирсәнт импорт беҗи елишни оттуриға қойған иди.

4-Март күни хитай һөкүмитиниң алақидар хадимлири өзлириниң америка билән сода уруши қилишни халимайдиғанлиқини, әксичә өз мәнпәәтини қоғдашқа майил икәнликини билдүргән.

CNBC Ниң бу һәқтики хәвиридә ейтилишичә, хитайниң орунбасар ташқи ишлар министири җаң йесуй бу мәсилә һәққидә пикир баян қилип, «хитай һечқачан америка билән сода уруши қилишни халимайду. Әмма хитайниң мәнпәәти зиянға учриса қарапму олтурмайду» дегән. «Вал ситрет журнили»ниң бүгүнки мақалисидә көрситилишичә, җаң йесуй өзлириниң йеқин кәлгүсидә ақ сарай билән мушу мәсилә һәққидә сөһбәтләшмәкчи болуватқанлиқини билдүргән. Әмма ақ сарай «бундақ бир сөһбәтниң болидиғанлиқидин бизниң хәвиримиз йоқ икән» дегән.

Мәлум болушичә, икки тәрәп оттурисидики сода уруши темиси өткән йилдин буян қизиқ муһакимә нуқтилиридин болуп кәлмәктә икән. Америкидики әң чоң мәбләғ селиш ширкәтләрдин болған «көврүк сүйи бирләшмиси» ниң қурғучиси рай далйо 5-март күни өзиниң тор бетидә бу тоғрилиқ пикир баян қилип «америка билән хитай оттурисидики сода урушидин сақлиниш тамамән мумкин. Лекин бу уруш растинла партлиса, у һалда бу трагедийә болиду» дегән.

Пикирләр (0)
Share
Толуқ бәт