Xitay hökümiti: "Biz amérika bilen soda urushi qilishni xalimaymiz!"

Muxbirimiz eziz
2018-03-05
Élxet
Pikir
Share
Print

Amérika prézidénti donald tramp 2-mart küni "Soda urushi biz üchün bekmu paydiliq. Yene kélip uningda bizning utushimiz oyunning ornidiki bir ish" dep jakarlash bilen birge xitaydin import qilinidighan polat matériyallirigha 25 pirsent, alyumin matériyallirigha 10 pirsent import béji élishni otturigha qoyghan idi.

4-Mart küni xitay hökümitining alaqidar xadimliri özlirining amérika bilen soda urushi qilishni xalimaydighanliqini, eksiche öz menpe'etini qoghdashqa mayil ikenlikini bildürgen.

CNBC Ning bu heqtiki xewiride éytilishiche, xitayning orunbasar tashqi ishlar ministiri jang yésuy bu mesile heqqide pikir bayan qilip, "Xitay héchqachan amérika bilen soda urushi qilishni xalimaydu. Emma xitayning menpe'eti ziyan'gha uchrisa qarapmu olturmaydu" dégen. "Wal sitrét zhurnili"ning bügünki maqaliside körsitilishiche, jang yésuy özlirining yéqin kelgüside aq saray bilen mushu mesile heqqide söhbetleshmekchi boluwatqanliqini bildürgen. Emma aq saray "Bundaq bir söhbetning bolidighanliqidin bizning xewirimiz yoq iken" dégen.

Melum bolushiche, ikki terep otturisidiki soda urushi témisi ötken yildin buyan qiziq muhakime nuqtiliridin bolup kelmekte iken. Amérikidiki eng chong meblegh sélish shirketlerdin bolghan "Köwrük süyi birleshmisi" ning qurghuchisi ray dalyo 5-mart küni özining tor bétide bu toghriliq pikir bayan qilip "Amérika bilen xitay otturisidiki soda urushidin saqlinish tamamen mumkin. Lékin bu urush rastinla partlisa, u halda bu tragédiye bolidu" dégen.

Toluq bet