Хитай һөкүмити америкиға «йол қойидиғанлиқи» ни билдүрди

Мухбиримиз әзиз
2018-04-10
Елхәт
Пикир
Share
Принт

Америка билән хитай оттурисидики «сода уруши» ға мунасивәтлик вәзийәтниң кәскинлишишигә әгишип, 10-апрел күни хитай рәиси ши җинпиң өзлириниң импорт қилинған аптомобиллардин елинидиған таможна беҗини төвәнлитидиғанлиқи һәмдә әқлий мүлүк һоқуқини қоғдаш хизмитини күчәйтидиғанлиқини билдүргән.

Бирләшмә агентлиқниң 10-апрелдики хәвиридә көрситилишичә, ши җинпиң шу күни бир қетимлиқ сода көргәзмисидә банка саһәси һәмдә импорт миқдарини зор көләмдә ашуруш һәққидә вәдә бәргән. Гәрчә бу саһәләр дәл америка һөкүмити әң көңүл бөлүватқан саһәләр болсиму, ши җинпиң сөзидә америкиниң намини биваситә атимиған. У бу һәқтики сөзидә «хитай аллиқачан ишикни ечивәткән. Бу ишик бундин кейин пәқәт техиму зор ечилғуси» дегән.

У йәнә хитай һөкүмитиниң импорт қилинған машиниларға қоюлидиған таможна беҗини зор дәриҗидә төвәнлитидиғанлиқи һәмдә бу саһәдики чәтәллик карханичиларға «пат йеқинда» зор асанлиқ туғдуруп беридиғанлиқини тәкитлигән.

Анализчилар бу һәқтә пикир қилип «бу вәдиләр америка-хитай оттурисидики сода мунасивәтлиридә көрүлүватқан җиддийликни пәсәйтиштә зор иҗабий әһмийәткә игә» дейишиватқанлиқи мәлум.

Хитайниң әнглийәдә турушлуқ баш әлчиси лю шявмиң бу мунасивәт билән «муһапизәтчи» гезитидә баш мақалә елан қилип, хитайниң америка билән сода уруши қилиш нийитиниң йоқлуқини йәнә бир қетим тәкитлигән һәмдә «хитай шуниң билән бир вақитта өзини қоғдашқиму мәҗбур» дегән.

Пикирләр (0)
Share
Толуқ бәт