Xitay hökümiti amérikigha “Yol qoyidighanliqi” ni bildürdi

Muxbirimiz eziz
2018.04.10

Amérika bilen xitay otturisidiki “Soda urushi” gha munasiwetlik weziyetning keskinlishishige egiship, 10-aprél küni xitay re'isi shi jinping özlirining import qilin'ghan aptomobillardin élinidighan tamozhna béjini töwenlitidighanliqi hemde eqliy mülük hoquqini qoghdash xizmitini kücheytidighanliqini bildürgen.

Birleshme agéntliqning 10-apréldiki xewiride körsitilishiche, shi jinping shu küni bir qétimliq soda körgezmiside banka sahesi hemde import miqdarini zor kölemde ashurush heqqide wede bergen. Gerche bu saheler del amérika hökümiti eng köngül bölüwatqan saheler bolsimu, shi jinping sözide amérikining namini biwasite atimighan. U bu heqtiki sözide “Xitay alliqachan ishikni échiwetken. Bu ishik bundin kéyin peqet téximu zor échilghusi” dégen.

U yene xitay hökümitining import qilin'ghan mashinilargha qoyulidighan tamozhna béjini zor derijide töwenlitidighanliqi hemde bu sahediki chet'ellik karxanichilargha “Pat yéqinda” zor asanliq tughdurup béridighanliqini tekitligen.

Analizchilar bu heqte pikir qilip “Bu wediler amérika-xitay otturisidiki soda munasiwetliride körülüwatqan jiddiylikni peseytishte zor ijabiy ehmiyetke ige” déyishiwatqanliqi melum.

Xitayning en'gliyede turushluq bash elchisi lyu shyawming bu munasiwet bilen “Muhapizetchi” gézitide bash maqale élan qilip, xitayning amérika bilen soda urushi qilish niyitining yoqluqini yene bir qétim tekitligen hemde “Xitay shuning bilen bir waqitta özini qoghdashqimu mejbur” dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.