Aqsaray: “Béyjingdin soda mesiliside quruq wede emes, emeliy qedem kütimiz”
2018.04.11
Xitay dölet re'isi shi jinping tünügün xitayning aptomobil qatarliq amérika mallirigha qarita chégra béjini töwenlitidighanliqi we eqliy mülüklerning hoquqini qoghdaydighanliqi heqqide wede bergen idi.
Bügün amérika prézidénti donald tramp buninggha inkas qayturup, shi jinpingning bu “Angliq” pozitsiyesini qarshi alidighanliqi bildürdi.
Aqsarayning bayanatchisi sara sendér amérika terepning shi jinpingning sözliridin memnun bolmighanliqini, emma buning bilen birlikte xitay tereptin bu jehette emeliy qedem bésishni kütidighanliqini bayan qildi.
U, xitay terepning wedisidiki nuqtilar emelge ashqan'gha qeder, donald tramp élan qilghan xitay mallirigha chégra béjini östürüsh buyruqining küchke ige bolidighanliqini tekitlidi. U yene “Biz nutuqni emes, heriketni körüshni xalaymiz,” dédi.
Ötken heptilerde donald tramp, alyumin qatarliq 50 milyard dollarliq xitay méligha chégra béjini östüridighanliqini élan qilghandin kéyin, xitay terepmu sériq purchaq we aptomobil qatarliq amérika mallirigha chégra béjini ashuridighanliqini élan qilghan idi.
Buninggha jawaben donald tramp xitayning yene 100 milyard dollarliq mélining chégra béji östüridighanliqini élan qilghandin kéyin, shi jinping tünügün bu talash-tartishta yumshash pozitsiyesini körsetti.
Roytérs agéntliqining bu heqtiki xewiride déyilishiche, shi jinping bu qétimqi sözide yene xitay bazirini téximu erkinleshtürüdighanliqi we échiwétidighanliqini, chet'ellik soda-karxanichilargha téximu keng purset béridighanliqini tekitligen.
Buninggha donald tramp ijabiy baha bergen bolsimu, emma bezi közetküchiler, xitayning bu wedilirining burunmu éghizgha élin'ghanliqini, uningdin emeliy netije kütüshke bolmaydighanliqini ilgiri sürüshmekte.