Ақсарай: «бейҗиңдин сода мәсилисидә қуруқ вәдә әмәс, әмәлий қәдәм күтимиз»

Мухбиримиз шөһрәт һошур
2018-04-11
Елхәт
Пикир
Share
Принт

Хитай дөләт рәиси ши җинпиң түнүгүн хитайниң аптомобил қатарлиқ америка маллириға қарита чегра беҗини төвәнлитидиғанлиқи вә әқлий мүлүкләрниң һоқуқини қоғдайдиғанлиқи һәққидә вәдә бәргән иди.

Бүгүн америка президенти доналд трамп буниңға инкас қайтуруп, ши җинпиңниң бу «аңлиқ» позитсийәсини қарши алидиғанлиқи билдүрди.

Ақсарайниң баянатчиси сара сәндер америка тәрәпниң ши җинпиңниң сөзлиридин мәмнун болмиғанлиқини, әмма буниң билән бирликтә хитай тәрәптин бу җәһәттә әмәлий қәдәм бесишни күтидиғанлиқини баян қилди.

У, хитай тәрәпниң вәдисидики нуқтилар әмәлгә ашқанға қәдәр, доналд трамп елан қилған хитай маллириға чегра беҗини өстүрүш буйруқиниң күчкә игә болидиғанлиқини тәкитлиди. У йәнә «биз нутуқни әмәс, һәрикәтни көрүшни халаймиз,» деди.

Өткән һәптиләрдә доналд трамп, алюмин қатарлиқ 50 милярд долларлиқ хитай мелиға чегра беҗини өстүридиғанлиқини елан қилғандин кейин, хитай тәрәпму сериқ пурчақ вә аптомобил қатарлиқ америка маллириға чегра беҗини ашуридиғанлиқини елан қилған иди.

Буниңға җавабән доналд трамп хитайниң йәнә 100 милярд долларлиқ мелиниң чегра беҗи өстүридиғанлиқини елан қилғандин кейин, ши җинпиң түнүгүн бу талаш-тартишта юмшаш позитсийәсини көрсәтти.

Ройтерс агентлиқиниң бу һәқтики хәвиридә дейилишичә, ши җинпиң бу қетимқи сөзидә йәнә хитай базирини техиму әркинләштүрүдиғанлиқи вә ечиветидиғанлиқини, чәтәллик сода-карханичиларға техиму кәң пурсәт беридиғанлиқини тәкитлигән.

Буниңға доналд трамп иҗабий баһа бәргән болсиму, әмма бәзи көзәткүчиләр, хитайниң бу вәдилириниң бурунму еғизға елинғанлиқини, униңдин әмәлий нәтиҗә күтүшкә болмайдиғанлиқини илгири сүрүшмәктә.

Пикирләр (0)
Share
Толуқ бәт