Stéfén mur: "Amérika xitay bilen bolghan soda urushida hergizmu keynige chékinmesliki kérek"

Muxbirimiz shöhret hoshur
2018-04-11
Élxet
Pikir
Share
Print

Amérikidiki CNN téléwiziyesining iqtisadiy analizchisi stéfén mur bügün CNN torida bir obzor élan qilip, amérika hökümitini nöwettiki xitay bilen bolghan "Soda urushi" da hergizmu keynige chékinmeslikke dewet qilghan.

U maqaliside nöwettiki soda toqunushining pay chéki bazirini égiz-pes qilidighan bir-ikki heptilik ish emes, belki uzun'gha sozulidighan we amérikining dölet bixeterlikidin tartip iqtisadiy tereqqiyatighiche tesir körsitidighan zor bir ish ikenlikini eskertken. Aptor maqaliside "Béyjing eqliy mülüklirimizni oghrilash we aldamchiliq qilish bilen amérikigha yiligha nechche yüz milyard dollar ziyan séliwatidu," dep yazghan.

U yene amérikining ittipaqdashliridin yaponiye, awstraliye we teywen qatarliq döletler bixeterlikiningmu tehditke uchrawatqanliqini eske salghan.

Xitayning özige tewe bolmighan jaylarda qanunsiz halda igilik hoquq telep qiliwatqanliqi, u jaylarda herbiy mewjudiyitini küchlendürüwatqanliqi, impéri'alistik ishtiha bilen kéngeymichilik qiliwatqanliqi eskertilgen bu maqalida "Xitaygha az meblegh sélip, köp zerbe béridighan jaza tedbirlirini qollinish" we bu arqiliq "Uninggha heddini bildürüsh hemde uni qanuniy yolgha yéteklesh" lazimliqi tekitlen'gen.

Stéfén mur, xitay bilen nöwettiki toqunushning dölet menpe'eti mesilisi ikenlikini eskertip, amérika siyasetchilirini xuddi "11‏-Séntebir weqesi" ge qarita bolghinidek siyasiy öktichilikni bir terepke qayrip qoyup, bir meydanda turushqa, donald trampning xitaygha qarshi jaza tedbirlirini qollashqa we ilhamlandurushqa chaqirghan.

CNN Torida tonushturulushiche, stéfén mur "Erkinlik ishi" namidiki bir konsérwatip meslihetchiler guruppisining ezasi we donald trampning saylam mezgilidiki sabiq iqtisad ishliri meslihetchisi iken.

Toluq bet