Amérika soda wekili: "Pilanimiz xitayning iqtisadiy sistémisigha chéqilish emes, belki bazirini échish"

Muxbirimiz shöhret hoshur
2018-05-02
Share

Xelq'ara xewerlerdin melum bolushiche, amérika-xitay soda talash-tartishini muzakire qilish üchün ikki terepning alaqidar aliy rehberliri béyjingda ikki künlük söhbet élip baridiken.

Söhbetke amérika tereptin prézidént donald trampning soda ishliri wekili robért litizer, maliye ministiri stéwin munchin, aqsarayning soda meslihetchisi pétér nawarrolar ishtirak qilidiken. Xitay tereptin bolsa shi jinpingning iqtisadiy ishlar meslihetchisi, xitayning mu'awin bash ministiri lyu xé qatnishidiken.

Litizer tünügün muxbirlargha qilghan sözide "Pilanimiz xitayning iqtisadiy sistémisini özgertish emes, peqet bazirini dunyagha échish" dégen.

Xitay tashqi ishlar ministirliqining bayanatchisi xu'a chünying bügünki bayanatida xitayning öz derwazisini bashqilarning könglini dep échip bermeydighanliqini, mejburlashqa échip bérishiningmu ötmüshke aylan'ghanliqini eskertken. Emma u yene amérika wekillirining bu nöwet yaxshi bir niyet bilen kelgenliki, mesile derhal hel bolup ketmigen teqdirdimu, bu söhbetning mesilining hel bolushida ijabiy rol oynaydighanliqini tilgha alghan.

Xewerlerde déyilishiche, ikki terep soda jédilide shi jinping arqisigha chékin'gendin kéyin, donald tramp xitayning amérika mashinilirigha bazirini achidighanliqtek bir qatar wedilirige ijabiy baha bergen. Emma bezi közetküchiler, xitayning yalghan wediler bilen qarshi terepni aldaydighanliqini we waqitni qolgha keltürmekchi boluwatqanliqi heqqide tramp hökümitini agahlandurghan idi.

Melum bolushiche, ikki terepning mezkur söhbiti peyshenbe we jüme künliri dawam qilidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet