Америка вә хитай бир қатар сода келишимлирини имзалиди

Мухбиримиз җүмә
2017-05-14
Share

Америка вә хитай даирилири америкиниң кала гөши вә пул муамилә саһәсиниң хитай базириға кириши мәсилисидә пикир бирлики һасил қилған.

Америка сода министири вилбур росниң 12-май ахбаратқа ашкарилишичә, мәзкур келишим икки дөләт ташқи содисида америка тәрәптә көрүлидиған қизил рәқәм соммисини төвәнлитишкә иҗабий тәсир көрситидикән.

Америка сода министирлики ашкарилиған санлиқ мәлуматқа қариғанда, өткән йили хитай билән содида америка тәрәптә 370 милярд доллар қизим рәқәм көрүлгән.

Икки тәрәп арисида һасил қилинған бу пикир бирлики америка президенти доналд трамп америкиниң ташқи содисиға алақидар икки парчә президент буйруқнамисигә имза қоюп аридин бир йерим ай өткәндә оттуриға чиқти.

Президент трамп 31-март икки буйруқнамигә имза қоюп, америка сода министирлиқини америкиниң ташқи содисиға алақидар һөҗҗәтләрни мупәссәл көздин кәчүрүшкә буйруған.

Мәзкур буйруқнамә имзалинип бир һәптидин кейин президент трамп хитай рәиси ши җинпиңни флоридадики туралғусида күтүвалған. Икки күнлүк учришиштин кейин, икки тәрәп сода мунасивәтлирини илгири сүрүш үчүн 100 күнлүк һәрикәт пилани түзүп чиққанлиқини елан қилған иди.

Җүмә күни бу һәқтә тохталған америка сода министири вилбур рус мундақ деди: "америка хитай сода мунасивәтлири әң юқири пәллигә чиқти, болупму сода җәһәттин ейтқанда техиму шундақ. Биз хитай билән бирликтә 100 күнлүк һәрикәт пиланиниң дәсләпки нәтиҗилирини җакарлаватимиз."

Мәлум болушичә, келишим бойичә хитай америка гөш мәһсулатлириға қарита нәччә йиллардин буян йүргүзүп келиватқан импорт чәклимисини бикар қилидикән.

Шуниң билән бир вақитта америка хитайдин киргүзидиған өй қушлири мәһсулатлириға қаратқан чәклимини юмшатқан. Келишим бойичә америка хитайдин пишурулған өй қушлири мәһсулатлирини импорт қилидикән.

Келишимдә йәнә америкиниң кредит карта системиси вә суюқландурулған газлирини хитай базириға киргүзүш қатарлиқ мәзмунларму бар икән.

Келишим бойичә, хитай тәрәп 16-июлғичә америка кала гөшлириниң хитайға импорт қилинишиға йол қойидикән.

Хитай даирилири америка кала гөшлирини импорт қилишқа 2003-йилидин башлап чәклимә қойған. Мәзкур чәклимә өткән йили бәзи шәртләр астида бошитилған болсиму, әмма хитай сетивалған кала гөши интайин аз болған.

Мәлум болушичә, америка хитай арисида һасил қилинған бу нөвәтлик келишим америка бақмичилиқ саһәсини хурсән қилған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт