Amérika we xitay bir qatar soda kélishimlirini imzalidi

Muxbirimiz jüme
2017-05-14
Share

Amérika we xitay da'iriliri amérikining kala göshi we pul mu'amile sahesining xitay bazirigha kirishi mesiliside pikir birliki hasil qilghan.

Amérika soda ministiri wilbur rosning 12-may axbaratqa ashkarilishiche, mezkur kélishim ikki dölet tashqi sodisida amérika terepte körülidighan qizil reqem sommisini töwenlitishke ijabiy tesir körsitidiken.

Amérika soda ministirliki ashkarilighan sanliq melumatqa qarighanda, ötken yili xitay bilen sodida amérika terepte 370 milyard dollar qizim reqem körülgen.

Ikki terep arisida hasil qilin'ghan bu pikir birliki amérika prézidénti donald tramp amérikining tashqi sodisigha alaqidar ikki parche prézidént buyruqnamisige imza qoyup aridin bir yérim ay ötkende otturigha chiqti.

Prézidént tramp 31-mart ikki buyruqnamige imza qoyup, amérika soda ministirliqini amérikining tashqi sodisigha alaqidar höjjetlerni mupessel közdin kechürüshke buyrughan.

Mezkur buyruqname imzalinip bir heptidin kéyin prézidént tramp xitay re'isi shi jinpingni floridadiki turalghusida kütüwalghan. Ikki künlük uchrishishtin kéyin, ikki terep soda munasiwetlirini ilgiri sürüsh üchün 100 künlük heriket pilani tüzüp chiqqanliqini élan qilghan idi.

Jüme küni bu heqte toxtalghan amérika soda ministiri wilbur rus mundaq dédi: "Amérika xitay soda munasiwetliri eng yuqiri pellige chiqti, bolupmu soda jehettin éytqanda téximu shundaq. Biz xitay bilen birlikte 100 künlük heriket pilanining deslepki netijilirini jakarlawatimiz."

Melum bolushiche, kélishim boyiche xitay amérika gösh mehsulatlirigha qarita nechche yillardin buyan yürgüzüp kéliwatqan import cheklimisini bikar qilidiken.

Shuning bilen bir waqitta amérika xitaydin kirgüzidighan öy qushliri mehsulatlirigha qaratqan cheklimini yumshatqan. Kélishim boyiche amérika xitaydin pishurulghan öy qushliri mehsulatlirini import qilidiken.

Kélishimde yene amérikining krédit karta sistémisi we suyuqlandurulghan gazlirini xitay bazirigha kirgüzüsh qatarliq mezmunlarmu bar iken.

Kélishim boyiche, xitay terep 16-iyulghiche amérika kala göshlirining xitaygha import qilinishigha yol qoyidiken.

Xitay da'iriliri amérika kala göshlirini import qilishqa 2003-yilidin bashlap cheklime qoyghan. Mezkur cheklime ötken yili bezi shertler astida boshitilghan bolsimu, emma xitay sétiwalghan kala göshi intayin az bolghan.

Melum bolushiche, amérika xitay arisida hasil qilin'ghan bu nöwetlik kélishim amérika baqmichiliq sahesini xursen qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet