Президент трамп: «америка-хитай сода сөһбитиниң нәтиҗигә еришишидин гуман қилимән»

Мухбиримиз әркин
2018-05-17
Елхәт
Пикир
Share
Принт

2‏-Нөвәтлик америка-хитай сода сөһбити пәйшәнбә күни вашингтонда башланди. Сөһбәт башланған дәл шу күни президент трамп мухбирларға сөһбәтниң бирәр нәтиҗә билән ахирлишишиға гуман билән қарайдиғанлиқини тәкитлигән.

Фирансийә ахбарат агентлиқиниң хәвәр қилишичә, президент трамп пәйшәнбә күни мухбирларниң «америка-хитай сода сүһбити бирәр келишим һасил қилидиғандәк турамду,» дегән соалиға «мән буниңдин гуман қилимән», «хитай бәк һәддидин ешип кәтти, чүнки улар америкидин еришмәкчи болған нәрсисигә толуқ еришип кәлди,» дегән.

Президент трамп бу сөзләрни хитай сода вәкилләр өмикиниң башлиқи, хитайниң муавин баш министири лю хени қобул қилиштин сәл бурун қилған. У йәнә америкиниң алдинқи нөвәтлик һөкүмәтлирини тәнқидләп, пул мәсилисидә дунядики һечқандақ һөкүмәт америка хитайға йол қойғандәк башқа дөләткә ундақ йол қоюп бақмиғанлиқини билдүргән. Фирансийә агентлиқиниң хәвиридә көрситишичә, президенти трамп хитайниң америкини юлуп кәлгәнликини әскәртип, икки дөләтниң оттурисида «сода бир тақ линийәлик йол болуп кәлди. Мән ши җинпиңға әмди буниңға йол қоялмайдиғанлиқини ейттим,» дегән. Америка малийә министири мнучин билән хитай вәкилләр өмикиниң башлиқи лю хе оттурисидики сода сөһбити пәйшәнбә вә җүмә икки күн давам қилиду.

Фирансийә агентлиқиниң хәвиридә билдүрүшичә, сөһбәткә йәнә америкиниң сода министири вилбур рос вә сода вәкили роберт лайтезир қатнишидикән. Хитай сода министирлиқиниң баянатчиси гав фең пәйшәнбә күни икки тәрәп оттурисидики ихтилапниң сөһбәттә һәл болушини өмид қилидиғанлиқини билдүрүп, «һәр һалда һәр хил еһтемаллиқларға тәйярлиқ қилип қойғанлиқи» ни тәкитлигән.

Америка йеқинда хитайниң җоңшиң ширкитигә ембарго қоюп, бу ширкәтни вәйран болуш гирдабиға чүшүрүп қойған иди. Фирансийә агентлиқиниң хәвәр қилишичә, президент трамп пәйшәнбә күни җоңшиң ширкитигә тутқан позитсийәсиниң юмшиғанлиқини рәт қилған. Президент трампниң җоңшиң ширкитини қутқузушқа вәдә қилғанлиқи һәққидики хәвәрләр америка дөләт мәҗлисиниң бәзи әзалириниң диққитини қозғиған. Улар һөкүмәтни агаһландуруп, җоңшиң ширкитиниң америка бихәтәрликигә хәвп икәнликини тәкитлигән иди.

Пикирләр (0)
Share
Толуқ бәт