Prézidént tramp: "Amérika-xitay soda söhbitining netijige érishishidin guman qilimen"

Muxbirimiz erkin
2018-05-17
Élxet
Pikir
Share
Print

2‏-Nöwetlik amérika-xitay soda söhbiti peyshenbe küni washin'gtonda bashlandi. Söhbet bashlan'ghan del shu küni prézidént tramp muxbirlargha söhbetning birer netije bilen axirlishishigha guman bilen qaraydighanliqini tekitligen.

Firansiye axbarat agéntliqining xewer qilishiche, prézidént tramp peyshenbe küni muxbirlarning "Amérika-xitay soda sühbiti birer kélishim hasil qilidighandek turamdu," dégen so'aligha "Men buningdin guman qilimen", "Xitay bek heddidin éship ketti, chünki ular amérikidin érishmekchi bolghan nersisige toluq ériship keldi," dégen.

Prézidént tramp bu sözlerni xitay soda wekiller ömikining bashliqi, xitayning mu'awin bash ministiri lyu xéni qobul qilishtin sel burun qilghan. U yene amérikining aldinqi nöwetlik hökümetlirini tenqidlep, pul mesiliside dunyadiki héchqandaq hökümet amérika xitaygha yol qoyghandek bashqa döletke undaq yol qoyup baqmighanliqini bildürgen. Firansiye agéntliqining xewiride körsitishiche, prézidénti tramp xitayning amérikini yulup kelgenlikini eskertip, ikki döletning otturisida "Soda bir taq liniyelik yol bolup keldi. Men shi jinpinggha emdi buninggha yol qoyalmaydighanliqini éyttim," dégen. Amérika maliye ministiri mnuchin bilen xitay wekiller ömikining bashliqi lyu xé otturisidiki soda söhbiti peyshenbe we jüme ikki kün dawam qilidu.

Firansiye agéntliqining xewiride bildürüshiche, söhbetke yene amérikining soda ministiri wilbur ros we soda wekili robért laytézir qatnishidiken. Xitay soda ministirliqining bayanatchisi gaw féng peyshenbe küni ikki terep otturisidiki ixtilapning söhbette hel bolushini ömid qilidighanliqini bildürüp, "Her halda her xil éhtémalliqlargha teyyarliq qilip qoyghanliqi" ni tekitligen.

Amérika yéqinda xitayning jongshing shirkitige émbargo qoyup, bu shirketni weyran bolush girdabigha chüshürüp qoyghan idi. Firansiye agéntliqining xewer qilishiche, prézidént tramp peyshenbe küni jongshing shirkitige tutqan pozitsiyesining yumshighanliqini ret qilghan. Prézidént trampning jongshing shirkitini qutquzushqa wede qilghanliqi heqqidiki xewerler amérika dölet mejlisining bezi ezalirining diqqitini qozghighan. Ular hökümetni agahlandurup, jongshing shirkitining amérika bixeterlikige xewp ikenlikini tekitligen idi.

Toluq bet