Tramp xitayning 50 milyard dollarliq mehsulatlirigha 25 pirsent chégra béji qoyidighanliqini bildürdi

Muxbirimiz qutlan
2018-06-15
Élxet
Pikir
Share
Print

"Muhapizetchi" gézitining bügün, yeni 15-iyun künidiki mexsus xewirige qarighanda, amérika prézidénti tramp xitayning amérikigha éksport qilidighan 50 milyard dollar qimmitidiki mehsulatliridin 25 pirsent chégra béji alidighanliqini élan qilghan.

"Muhapizetchi" géziti bilen s n n téléwiziyesining bu heqtiki xewiride "Trampning bu qarari uzun mezgillik til urushidin kéyin dunya iqtisadidiki ikki chong yétekchi dölet otturisida keng kölemlik soda urushining resmiy bashlinidighanliqidin bésharet bermekte," déyilgen.

Aqsarayning bu heqtiki bayanatida xitay mehsulatlirigha qoyulidighan chégra béjining asasliqi "Sana'et sahesidiki nazuk téxnologiye" ge qaritilidighanliqi ilgiri sürülgen.

Prézidént tramp bu heqte mundaq dégen: "Ikki dölet otturisidiki soda munasiwiti uzundin buyan adaletsiz bir halette dawamliship keldi. Amérika qoshma shtatliri buningdin kéyin bu xil adaletsiz soda munasiwiti arqiliq özining téxnologiye we eqliy mülük bayliqlirining ziyan'gha uchrishigha hergizmu chidap turalmaydu."

S n n téléwiziyesining bügünki xewirige qarighanda, tramp hökümitining bu qarari xitayning échishiwatqan yarisigha tuz sepken. Xitay soda ministirliqi bügün derhal bayanat élan qilip, "Amérika junggogha qarita soda urushi qozghawatidu," dégen.

Xitay terep öz bayanatida gerche söz oyuni oynap, amérika bilen bolghan soda munasiwitide pütün imkaniyetliri bilen xitayning milliy menpe'etini qoghdaydighanliqi heqqide dawrang salghan bolsimu, emma ilgiriki pozitsiyesidiki qattiqliq ghayib bolghan. Xitay soda ministirliqining bayanatida trampning bu qararining her ikki döletke oxshashla zerer yetküzidighanliqi tekitlinip, "Junggo hergizmu soda urushini xalimaydu," déyilgen.

Toluq bet