Xitayning amérikigha meblegh sélish nisbitide tik yönilishte chüshüsh yüz bergen

Bügün nyu-yorktiki “Rodiyum guruppisi” namliq bir iqtisad tetqiqat ornining élan qilishiche, xitay shirketlirining amérikigha salghan meblighi ötken yil oxshash mezgildikige sélishturghanda 7 milyard 800 milyon dollar töwenlep, meblegh sélish nisbitide tik yönilishlik chüshüsh yüz bergen.

Mezkur guruppining doklatida yene bu yil amérikidiki xitay shirketlirining 9 milyard 600 milyon dollar qimmitidiki paydidin mehrum qalghanliqi, bazardiki 4 milyard dollar qimmitidiki mélining bésilip qalghanliqi tilgha élin'ghan.

Roytérs agéntliqining bügünki bu heqtiki xewiride déyilishiche, xitay terep tartqan bu ziyan'gha amérikining xitaygha qaratqan soda sahesidiki tedbirliri seweb bolghan iken.

Xewerde déyilishiche, bir xitay shirkitining amérikidiki manéygram shirkitini, yeni bir pul yötkesh shirkitini bir milyard ikki yüz milyon dollargha sétiwélish pilani qatarliq bir qisim pilanliri amérikining chet'el meblighini sürüshte qilish orgini teripidin toxtitip qoyulghan.

Amérikida xitay shirketlirining ilgiridek bazar tapalmaydighanliqini pemligen bir qisim xitay shirketliri amérikidiki mal-bisatlirini sétishqa bashlighan. Xewerde déyilishiche, xitayning dalyen we enbang shirkiti özlirining nyu-york we san-fransiskodiki binalirini sétiwetken.