Xitay bir qisim amérika towarlirigha tamojna béji qoyushni kéchiktürgen

Muxbirimiz erkin
2018-07-09
Élxet
Pikir
Share
Print

Amérika hökümiti ötken jüme künidin bashlap 34 milyard dollarliq xitay mehsulatigha 25% baj qoyushni resmiy ijra qilishqa bashlighandin kéyin xitay oxshash miqdardiki amérika mehsulatigha baj qoyidighanliqini jakarlighan idi.

Lékin roytérs agéntliqining düshenbe küni xewer qilishiche, xitay tamozhna idarisi tizimliktiki bir qisim amérika mehsulatlirigha baj qoyushni kéchiktürüp, "Merkez" ning yolyoruqini kütüshke bashlighan.

Bezi közetküchilerning körsitishiche, bu amérika-xitay soda urushida prézidént trampning üstünlükni igilep, xitayning temtirep qalghanliqini körsitidiken.

Amérika 2017‏-yili xitaygha 130 milyard dollar mal satqan. Halbuki, xitay amérikigha 505 milyard dollarliq mehsulat éksport qilghan idi. Prézidént tramp ötken peyshenbe küni tamozhna béjini 500 milyard dollargha chiqirishi mumkinlikini tekitligen idi.

Birleshme agéntliqining düshenbe küni bergen xewiride, xitayning amérika aptomobil karxanilirigha parakendichilik sélish, qolidiki amérika xezine chékini sétish, shimaliy koréye mesilisidiki diplomatik tirishchanliqigha buzghunchiliq qilishtek yollargha bash urushi mumkinlikini bildürgen. Lékin xewerde qeyt qilishiche, eger xitay bu yolgha kirse, bezi heriketliri uning özige ziyanliqiken.

Roytérs agéntliqining düshenbe küni bergen xewiride körsitishiche, xitayning chingdaw, daliyen, shangxey qatarliq portliridiki tamozhna tarmaqliri düshenbe küni amérika mehsulatlirigha qarita bajni kücheytken. Emma tizimliktiki bezi mehsulatlargha baj qoyushni kéchiktürgen. Roytérsning xewiride, hazir amérikining 70 tonna purchaq basqan bir paraxoti dalyen portida toxtap turuwatqanliqi, xitayning uning uninggha 25 %baj qoyush-qoymasliqi melum emeslikini bildürgen.

Toluq bet