Amérika-xitay soda urushi xitayda türlük inkaslarni qozghimaqta

Muxbirimiz eziz
2018-07-16
Élxet
Pikir
Share
Print

Amérika bilen xitay otturisidiki soda urushi bashlan'ghandin kéyin xitay hökümitining eng chong inkasi 16-iyul küni dunya soda teshkilatigha erz sunush bolghan.

Melum bolushiche, xitay hökümiti diplomatiye wasitisi arqiliq amérika hökümitining 200 milyard amérika dolliriliq tamozhna béji tehditige taqabil turmaqchi bolghan.

Birleshme agéntliqning 16-iyuldiki xewiride éytilishiche, tramp hökümiti ilgiri xitay peyda qiliwatqan iqtisadiy mesililerni bir yaqliq qilishta dunya soda teshkilatining qolidin héchnerse kelmigenlikini tenqidligen idi. Shunga bu qétim ular bu heqte so'al soralghanda "Xitayning bu usulda ish körüshi bizning unche perwayimizgha kelmeydu" dégen.

Shuning bilen birge xitay re'isi shi jinpingning ismi 15-iyul küni xitaydiki eng chong gézit bolghan "Xelq géziti" ning 1-bétide chortla ishlitilmigen. Shi jinping dégen isim adette mezkur gézitning bash bétide her küni tekrar közge chéliqidighan bolup, shi jinping dégen isimning uchrimasliqi mushu heptining ichide ikki qétim körülgen.

"Amérika awazi" ning bu heqtiki mulahiziside bir qisim analizchilar bu halni amérika bilen xitay otturisidiki soda urushi sewebidin kélip chiqqan, dep qarimaqta iken. Chünki shexske choqunushni ewj aldurushta eyni waqitta maw zédong qollan'ghan usulni ijra qiliwatqan shi jinpingning ismi her küni kompartiye kontrolluqidiki axbarat wasitilirining bash bétidin orun élip kelgen iken.

Mezkur analiz maqaliside körsitilishiche, nöwette amérika bilen xitay otturisidiki soda urushi dunya axbaratida eng qiziq témilardin boluwatqan bolsimu, xitayning asasliq axbarat wasitiliride bu heqtiki xewerler yoqning ornida iken. Xitay hökümiti ilgiriki waqitlarda éghzidin chüshürmey kelgen "Herqandaq bedel tölesh töleshtin qet'iynezer" deydighan sözlirimu hazir pütünley ghayib bolghan.

Amérika hökümiti qaytidin xitay mallirigha yene 10 pirsentlik tamozhna béji qoyidighanliqini bildürgendin kéyin muxbirlar "Xitay hökümiti bu heqte qandaq qilmaqchi?" dep sorighanda xitay dölet ishliri kabinétining bayanatchisi bu so'algha jawab bérishni ret qilghan.

Toluq bet