Prézidént tramp xitayning 300 milyard dollarliq mehsulatigha tamozhna béji qoyidighanliqini élan qildi

Béyjingda ötküzülgen amérika-xitay soda söhbitining netijisi axirlishishi bilen ikki terep otturisidiki soda urushi qaytidin jiddiylishishke bashlidi.

Amérika prézidénti donald tramp 1‏-awghust küni tiwittérda uchur yollap, xitayning qep qalghan 300 milyard dollarliq import mehsulatigha 10 pirsent tamozhna béji qoyidighanliqini élan qilghan. Uning ilgiri sürüshiche, 10pirsent tamozhna béji bu yil 1‏-séntebirdin bashlap ijra qilinidiken.

Prézidént tramp buningdin burun xitayning 250‏ milyard dollarliq mehsulatigha baj qoyghan idi. Eger uning qarari 9‏-ayda ijra qilinishqa bashlisa xitayning amérikagha éksport qilidighan barliq mehsulatlirigha tamozhna béji qoyulghan bolidu. U tiwittérda élan qilghan uchurida “Esli biz ‏3‏-ayning aldida xitay bilen soda kélishimi imzalashni oylighan. Biraq kishini epsuslandurghini shuki, xitay kélishimge imza qoyushtin burun qayta söhbet élip bérishni telep qildi.

Tramp “Xitay téxi yéqindila zor miqdarda amérikaning déhqanchiliq mehsulatlirini sétiwélishni qarar qilghan bolsimu, emma sétiwalmidi” dégen. Prézidént trampning ilgiri sürüshiche, ilgiri shi jinping uninggha amérikagha zeherlik madda‏-fentanil sétishni toxtitidighanliqini bildürgen bolsimu, lékin xitay bu wedisige emel qilmighan. Tramp yene shi jinpingning amérika bilen soda kélishimi imzalashqa aldirimaywatqanliqi, lékin xitay amérika bilen soda qilmighan teqdirdimu buning amérika üchün chong mesile emeslikini tekitligen.

Prézidént tramp yuqiriqi sözlerni 12‏-nöwetlik amérika-xitay soda söhbiti peyshenbe küni shangxeyde netijisiz axirliship arqidinla qilghan. Xitay hökümiti 2‏-awghust küni prézidént trampning qararigha inkas bildürüp, eger amérika 10 pirsent tamozhna béji élishqa bashlisa, xitayning tégishlik öch élish tedbirlirini qollinidighanliqini bildürgen. Emma qandaq tedbir qollinidighanliqini chüshendürmigen.