Хитай америкиға сода сөһбити өткүзүш үчүн өмәк әвәтидикән

Мухбиримиз ирадә
2018-08-16
Елхәт
Пикир
Share
Принт

Хитай америкиға сода ихтилапи үстидә сөзлишиш үчүн өмәк әвәтидикән. «Вал-стрет журнили» гезитиниң хәвәр қилишичә, америка-хитай сода урушиниң күчийиши билән хитай тәрәп америкиға вәкил әвәтип сөһбәт өткүзмәкчи болған. Икки тәрәп сода вәкиллириниң учришиши мушу айниң 22-23 күнлири елип берилидикән.

Ақсарай баянатчиси 16-авғуст пәйшәнбә күнидики баянатида америкиниң хитай билән қурулма характерлик мәсилиләрни музакирә қилиш үчүн һәр вақит ишики очуқлуқини билдүргән вә «биз хитай һөкүмитидин бу мәсилиләрни һәл қилишини вә бизгә конкрет тәклипләр билән келишини үмид қилимиз,» дегән.

«Вал-стрет журнили» гезитиниң билдүрүшичә, сода мутәхәссислири бу қетимлиқ учришиштин конкрет бир нәтиҗә чиқиду дәп қаримайдикән. Чүнки трамп һөкүмитиниң хитай билән болған содидики тәңпуңсизлиқни түзәш, хитай йүәниниң алмаштуруш қиммитини контрол қилишини аяғлаштуруш нийити чиң болуп, икки тәрәпниң ортақ нуқтиға келиши асанға тохтимайдикән.

Америка президенти трамп йеқинда хитайға қаритилған таможна беҗини әслидики 10 пирсәнттин 25 пирсәнткә өстүрүш мумкинчиликидин сөз ачқандин кейин, хитай буниңға қаттиқ нарази болған иди. «Вал-стрет журнили» гезитиниң ейтишичә, америка-хитай сода уруши хитайниң пай чеки базириға еғир зәрбә бәргән.

Америкилиқ иқтисадшунаслар: «хитайниң иқтисади әмәлийәттә кишиләр ойлиғандәк ундақ күчлүк әмәс, бу қетимлиқ сода урушида бир қисим америка деһқанлири азрақ зиянға учриған болсиму, трамп һөкүмити аллиқачан уларни йөләйдиған пиланларни тәйярлап болди. Әгәр бу қетимлиқ сөһбәткә хитай тәрәп бир конкрет пилан билән кәлмәйдикән, у һалда бу хитай үчүн вақит исрап қилиштин башқа иш әмәс,» дегән.

Пикирләр (0)
Share
Толуқ бәт