Xitay amérikigha soda söhbiti ötküzüsh üchün ömek ewetidiken

Muxbirimiz irade
2018-08-16
Élxet
Pikir
Share
Print

Xitay amérikigha soda ixtilapi üstide sözlishish üchün ömek ewetidiken. "Wal-strét zhurnili" gézitining xewer qilishiche, amérika-xitay soda urushining küchiyishi bilen xitay terep amérikigha wekil ewetip söhbet ötküzmekchi bolghan. Ikki terep soda wekillirining uchrishishi mushu ayning 22-23 künliri élip bérilidiken.

Aqsaray bayanatchisi 16-awghust peyshenbe künidiki bayanatida amérikining xitay bilen qurulma xaraktérlik mesililerni muzakire qilish üchün her waqit ishiki ochuqluqini bildürgen we "Biz xitay hökümitidin bu mesililerni hel qilishini we bizge konkrét teklipler bilen kélishini ümid qilimiz," dégen.

"Wal-strét zhurnili" gézitining bildürüshiche, soda mutexessisliri bu qétimliq uchrishishtin konkrét bir netije chiqidu dep qarimaydiken. Chünki tramp hökümitining xitay bilen bolghan sodidiki tengpungsizliqni tüzesh, xitay yüenining almashturush qimmitini kontrol qilishini ayaghlashturush niyiti ching bolup, ikki terepning ortaq nuqtigha kélishi asan'gha toxtimaydiken.

Amérika prézidénti tramp yéqinda xitaygha qaritilghan tamozhna béjini eslidiki 10 pirsenttin 25 pirsentke östürüsh mumkinchilikidin söz achqandin kéyin, xitay buninggha qattiq narazi bolghan idi. "Wal-strét zhurnili" gézitining éytishiche, amérika-xitay soda urushi xitayning pay chéki bazirigha éghir zerbe bergen.

Amérikiliq iqtisadshunaslar: "Xitayning iqtisadi emeliyette kishiler oylighandek undaq küchlük emes, bu qétimliq soda urushida bir qisim amérika déhqanliri azraq ziyan'gha uchrighan bolsimu, tramp hökümiti alliqachan ularni yöleydighan pilanlarni teyyarlap boldi. Eger bu qétimliq söhbetke xitay terep bir konkrét pilan bilen kelmeydiken, u halda bu xitay üchün waqit israp qilishtin bashqa ish emes," dégen.

Toluq bet