Ақ сарайниң иқтисад мәслиһәтчиси петир наварро хитайни «дуня иқтисадиға чүшкән паразит», деди

Мухбиримиз ирадә
2018-09-11
Елхәт
Пикир
Share
Принт

Америка дөләтлик сода кеңишиниң башлиқи, ақ сарайниң иқтисад мәслиһәтчиси петир наварро хитайни «дуня иқтисадиға чүшкән бир паразит» дәп тәсвирлигән.

У бу сөзни 7-сентәбир җүмә күни фокс телевизийәсиниң программисиға қатнашқанда қилған болуп, петир наварро сөзидә: «хитай қурулма җәһәттин дунядики бир паразит болушқа қарап илгирилимәктә, чүнки хитайниң өз иқтисадини күчләндүрүш үчүн басқан һәрбир қәдими башқиларни зиянға учритиватиду» дегән.

Петир наварро йәнә хитайниң иқтисадий тәрәққиятиниң техника оғрилиқи бәдилигә кәлгәнликини әскәртип: «хитай әқлий мүлк оғрилиқи бәдилигә кәлгән иқтисад моделини давамлаштуруштин ваз кәчмәйду. Чүнки, униң тәрәққиятиниң асасий қисми шуниңдин кәлгән турса» дегән.

Мәлум болушичә, америка президенти доналд трамп йәнә 267 милярд доллар қиммитидики хитай импорт мәһсулатлириға баҗ қоюшни ойлишиватқан болуп, петир наварро сөзидә америка президенти трампниң америкилиқ әмгәкчиләрниң мәнпәәтлирини қоғдаш үчүн хитайни сода җәһәттә җазалашни давам қилидиғанлиқини билдүргән. У сөзидә «америка һөкүмитимиз әлвәттә хитай билән адил мунасивәт қурушни арзу қилиду. Бирақ у һазирчә әмәлгә ашидиғандәк әмәс» дегән.

Петир наварро әслидә калифорнийә университетиниң профессори, тонулған иқтисадшунас вә сәрмайә мутәхәссиси болуп, у трампниң сайлам паалийәтлири мәзгилидики мәслиһәтчилириниң бири иди. У, 2011-йили елан қилинған «хитай сәвәб болған өлүм» намлиқ китабниң аптори болуп, униң зор тәсир қозғиған бу китаби 2012-йилиға кәлгәндә һөҗҗәтлик филим қилипму ишләнгән.

Пикирләр (0)
Share
Толуқ бәт