Aq sarayning iqtisad meslihetchisi pétir nawarro xitayni "Dunya iqtisadigha chüshken parazit", dédi

Muxbirimiz irade
2018-09-11
Élxet
Pikir
Share
Print

Amérika döletlik soda kéngishining bashliqi, aq sarayning iqtisad meslihetchisi pétir nawarro xitayni "Dunya iqtisadigha chüshken bir parazit" dep teswirligen.

U bu sözni 7-séntebir jüme küni foks téléwiziyesining programmisigha qatnashqanda qilghan bolup, pétir nawarro sözide: "Xitay qurulma jehettin dunyadiki bir parazit bolushqa qarap ilgirilimekte, chünki xitayning öz iqtisadini küchlendürüsh üchün basqan herbir qedimi bashqilarni ziyan'gha uchritiwatidu" dégen.

Pétir nawarro yene xitayning iqtisadiy tereqqiyatining téxnika oghriliqi bedilige kelgenlikini eskertip: "Xitay eqliy mülk oghriliqi bedilige kelgen iqtisad modélini dawamlashturushtin waz kechmeydu. Chünki, uning tereqqiyatining asasiy qismi shuningdin kelgen tursa" dégen.

Melum bolushiche, amérika prézidénti donald tramp yene 267 milyard dollar qimmitidiki xitay import mehsulatlirigha baj qoyushni oylishiwatqan bolup, pétir nawarro sözide amérika prézidénti trampning amérikiliq emgekchilerning menpe'etlirini qoghdash üchün xitayni soda jehette jazalashni dawam qilidighanliqini bildürgen. U sözide "Amérika hökümitimiz elwette xitay bilen adil munasiwet qurushni arzu qilidu. Biraq u hazirche emelge ashidighandek emes" dégen.

Pétir nawarro eslide kaliforniye uniwérsitétining proféssori, tonulghan iqtisadshunas we sermaye mutexessisi bolup, u trampning saylam pa'aliyetliri mezgilidiki meslihetchilirining biri idi. U, 2011-yili élan qilin'ghan "Xitay seweb bolghan ölüm" namliq kitabning aptori bolup, uning zor tesir qozghighan bu kitabi 2012-yiligha kelgende höjjetlik filim qilipmu ishlen'gen.

Toluq bet