Amérika hökümet organliri xitayning yighiwélish lagérlirida ishlepchiqirilghan import mehsulatlirini tekshürüshke bashlighan
2018.12.24
Amérika hökümet organliri amérikidiki bezi shirketlerning xitayning xotendiki yighiwélish lagérlirida ishlepchiqirilghan kiyim-kécheklerni import qilip, amérika bazirigha salghanliqigha da'ir xewerlerdin kéyin mezkur mesilini tekshürüshke bashlighan.
Yéqinda birleshme agéntliq, “Nyu-york waqti” géziti qatarliq axbarat orunliri amérikidiki bajér tenterbiye kiyimliri shirkitining bu mehsulatlarni import qilghanliqini ashkarilighan idi. Xewerde bu mehsulatlar “Teyda hessidarliq cheklik shirkiti” namliq xitay karxanisining xotendiki yighiwélish lagérlirida qurghan zawutida ishlepchiqirilghanliqi, bu orunda lagérdiki Uyghur tutqunlirining mejburiy emgekke séliwatqanliqi ilgiri sürülgen idi.
Amérikidiki “Dewr” zhurnilining xewer qilishiche, amérika tamozhna we chégra qoghdash idarisi bayanat élan qilip, birleshme agéntliq we bashqa taratqularning xewerliride “Tunji qétim bir amérika shirkiti import qilghan mehsulatlarning xitayning gherbidiki yighiwélish lagérlirida ishlepchiqirilghanliqigha munasiwetlik ikenliki qeyt qilin'ghanliqi” ni bildürgen.
Mezkur weqe amérikida zor ghulghula qozghighan. Ötken hepte nurghun uniwérsitétlar “Bajér tenterbiye kiyimliri” ning mehsulatlirini sétishni toxtatqan idi. “Dewr” zhurnilining xewiride qeyt qilinishiche, amérikidiki “Ishchilar heqliri komissyoni” namliq emgek teshkilati “Herqandaq mejburiy emgekning uniwérsal belgilimige xilap” ikenlikini eskertip, bajér shirkiti uniwérsitétlargha teminligen mehsulat birleshme agéntliqining xewiride qeyt qilin'ghan lagérning ichidiki karxanida ishlepchiqirilghan mehsulatlar bilen eynen ikenlikini bildürgen. Amérika tamozhna we chégra qoghdash idarisi bayanatida yene “Shexslerning mejburiy emgekke sélinishi we döletning iqtisadini zamaniwi qullar emgikidin xali tutushqa da'ir qanunlarni ijra qilish bu organning wezipisi” dégen.