Америка хитайниң хәлқара сода-тиҗарәттики йолсизлиқини тизгинләшкә тәйярланмақта

Мухбиримиз шөһрәт һошур
2017-08-02
Елхәт
Пикир
Share
Принт

Бирләшмә агентлиқиниң хәвәр қилишичә ақ сарайниң содиға алақидар бир хадими өз намини ашкарилимиған һалда президент доналд трамп һөкүмитиниң хитай сода ишлиридики техника оғрилаш қатарлиқ бир қатар тиҗарәт қилмишлирини тизгинләш үчүн музакирә елип бериватқанлиқини ашкарилиған.

Мәлум болушичә америкиниң 1974-йили мақулланған тиҗарәт қануниниң 301-маддиси музакирә қилиниватқан болуп, бу маддида америка президентиға америкиниң тиҗарәт мәнпәитини қоғдаш үчүн чәтәл маллириға қарита чегра беҗини ашуруш, содиға хилаплиқ қилғанларни җазалаш һоқуқи берилгән. Мәзкур алақидар хадим йәнә һөкүмәтниң пат йеқинда уқтуруш елан қилип хитайниң алақидар тиҗарәт қилмишлири үстидин тәкшүрүш елип баридиғанлиқини баян қилған. 

Хәвәрләрдин мәлум болушичә америка хитайниң сода ишлиридики пул қиммитини тәңшәш мәсилиси вә техника оғрилаш қатарлиқ бир йүрүш қилмишлиридин шикайәт қилмақта. Ройтерсниң бүгүнки бу һәқтики хәвиридә баян қилишичә хитай баш министири ли кечяң түнүгүнки сөзидә америка билән хитай арисидики сода мәнпәәтиниң һәрқандақ талаш-тартиштин үстүн туридиғанлиқини баян қилған. Әмма америка сода министири вилбур роз, түнүгүн «вал стирит журнили» ға қилған сөзидә америкиниң әркин вә адил содини халайдиғанлиқини вә әркин содиға вәдә берип қоюп, униң принсиплирини дәпсәндә қиливатқан сода бекинмичилирини тизгинләшкә чарилири барлиқини баян қилған.

Хәвәрләрдә дейилишичә, доналд трамп сайлам мәзгилидә хитайниң содидики һәқсиз қәдәмлирини тизгинләйдиғанлиқи һәққидә көп қетим вәдә бәргән , әмма вәзипигә чиққандин кейин хитай билән шималий корейә мәсилисидә һәмкарлишиш нийити билән, сода саһәсидә сүкүт қилған. Хитайниң шималий корейә мәсилисидики нөвәттики пассиплиқи, президент доналд трампниң сода мәсилисидә кәскин тәдбир елишиға йол һазирлиған.

Пикирләр (0)
Share
Толуқ бәт