Amérika xitayning xelq'ara soda-tijarettiki yolsizliqini tizginleshke teyyarlanmaqta

Muxbirimiz shöhret hoshur
2017-08-02
Élxet
Pikir
Share
Print

Birleshme agéntliqining xewer qilishiche aq sarayning sodigha alaqidar bir xadimi öz namini ashkarilimighan halda prézidént donald tramp hökümitining xitay soda ishliridiki téxnika oghrilash qatarliq bir qatar tijaret qilmishlirini tizginlesh üchün muzakire élip bériwatqanliqini ashkarilighan.

Melum bolushiche amérikining 1974-yili maqullan'ghan tijaret qanunining 301-maddisi muzakire qiliniwatqan bolup, bu maddida amérika prézidéntigha amérikining tijaret menpe'itini qoghdash üchün chet'el mallirigha qarita chégra béjini ashurush, sodigha xilapliq qilghanlarni jazalash hoquqi bérilgen. Mezkur alaqidar xadim yene hökümetning pat yéqinda uqturush élan qilip xitayning alaqidar tijaret qilmishliri üstidin tekshürüsh élip baridighanliqini bayan qilghan. 

Xewerlerdin melum bolushiche amérika xitayning soda ishliridiki pul qimmitini tengshesh mesilisi we téxnika oghrilash qatarliq bir yürüsh qilmishliridin shikayet qilmaqta. Roytérsning bügünki bu heqtiki xewiride bayan qilishiche xitay bash ministiri li kéchyang tünügünki sözide amérika bilen xitay arisidiki soda menpe'etining herqandaq talash-tartishtin üstün turidighanliqini bayan qilghan. Emma amérika soda ministiri wilbur roz, tünügün "Wal stirit zhurnili" gha qilghan sözide amérikining erkin we adil sodini xalaydighanliqini we erkin sodigha wede bérip qoyup, uning prinsiplirini depsende qiliwatqan soda békinmichilirini tizginleshke chariliri barliqini bayan qilghan.

Xewerlerde déyilishiche, donald tramp saylam mezgilide xitayning sodidiki heqsiz qedemlirini tizginleydighanliqi heqqide köp qétim wede bergen , emma wezipige chiqqandin kéyin xitay bilen shimaliy koréye mesiliside hemkarlishish niyiti bilen, soda saheside süküt qilghan. Xitayning shimaliy koréye mesilisidiki nöwettiki passipliqi, prézidént donald trampning soda mesiliside keskin tedbir élishigha yol hazirlighan.

Toluq bet