Американиң 200 милярд долларлиқ хитай маллириға чегра беҗи қоймақчи болғанлиқи хитайни әндишигә салмақта

Мухбиримиз ирадә
2018-08-02
Share

Америка хитай маллириға қаратқан чегра беҗини өстүрүши мумкинликини елан қилғандин кейин, хитайниң бир қисим рәһбәрлири бәс-бәс билән сөз қилип, америкини “өзини тутувелишқа” чақирған.

1-Авғуст күни трамп һөкүмити хитайға қоюлидиған 200 милярдлиқ долларлиқ сода беҗини әслидики 10 пирсәнттин 25 пирсәнткә чиқириши мумкинликини елан қилған иди. Америка сода вәкили роберт летһизер шу күнидики баянатида америка президенти трампниң өзлиридин хитайға қоюлидиған баҗни өстүрүшни ойлишип көрүшни ейтқанлиқини билдүргән вә “биз хитайға бәзи һәрикәтлирини өзгәртиши керәкликини интайин ениқ оттуриға қойдуқ. Әпсуски, хитай өзиниң зиянлиқ һәрикәтлирини өзгәртишниң орниға қанунсиз һалда америкалиқ әмгәкчиләр, деһқанлар, йеза-игилик хоҗайинлири вә америка шеркәтләрдин өч алмақта,” дегән. 

Хитай ташқи ишлар министири ваң йи буниңға дәрһал инкас қайтуруп, сода беҗини өстүргән тәқдирдә мал баһаси өрләп, америка истемалчилириға зиян беридиғанлиқини илгири сүргән. У сөзидә “биз америкини соғуққан болуп, америкалиқ истемалчилар вә хәлқара җамаәтниң авазиға қулақ селишқа чақиримиз,” дегән. 

Хитайниң сода министирлиқи бу һәқтә елан қилған баянатида, икки дөләтниң сода урушиниң нурғун дөләтләргә зиян беридиғанлиқини билдүрүп, америкини бу йолдин қайтишқа дәвәт қилған. 

Һалбуки, сенатор марко рубийо вә америка сода министири вилбор рус қатарлиқлар трампниң чегра беҗини өстүрмәкчи болушини қоллап, шундақ қилмиғанда хитайниң тиҗарәт услубини өзгәрткили болмайдиғанлиқини ейтқан.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт