Америка-хитай сода уруши кәскинләшти, хитай таратқулири президент трампни тиллашқа башлиди

Мухбиримиз әркин
2018-08-06
Share

Хитайниң һөкүмәт ахбарати 6-авғуст күни америка президенти трампниң сода сияситини тәнқидләп, униң шәхсийитигә һуҗум қилишқа башлиди. Чәтәл ахбарат васитилириниң илгири сүрүшичә, бу америка-хитай сода урушиниң техиму кәскинлишиватқанлиқини, хитайниң қаттиқ алақзадә болуватқанлиқини көрситидикән.

Хитай һөкүмити президент трампниң сода сияситигә қаттиқ нарази болсиму, лекин хитай һөкүмити һазирға қәдәр хитай һөкүмәт таратқулирини доналд трампқа очуқ-ашкара һуҗум қилиштин тосуп кәлгән иди. Һалбуки, хитайниң бу тактикиси дүшәнбә, йәни 6-авғуст күнидин башлап өзгиришкә башлиған.

Хитай “хәлқ гезити” ниң хәлқара басмиси 6-авғуст күни обзор елан қилип, һуҗум нишанини президент трампқа қаратқан. “хәлқ гезити” дики обзорда президент трамп “коча лүкчәклири” гә охшаш һәрикәт қилиш билән әйиплинип, униң хәлқара содини бир тәрәпниң пайдисиғила айландуруп қойғанлиқи тәнқид қилинған.

Ройтерс агентлиқиниң хәвиридә билдүрүшичә, “хәлқ гезити” ниң обзори президент трампниң буниңдин икки күн аввал твиттерда язған сөзидин кейин елан қилинған. Президент трамп твиттерда язған сөзидә өзиниң хитай експорт мәһсулатлириға таможна беҗи қоюш истратегийәсиниң “пәрәз қилғандинму яхши үнүм бәргәнлики” ни тәкитлигән. У бу учурида йәнә бейҗиңниң америка билән сода сөһбити өткүзүшни тәләп қиливатқанлиқини билдүргән иди.

Трамп һөкүмити буниң сәл алдида хитайниң 200 милярд долларлиқ експорт мәһсулатиға қоюлған 10 пирсәнтлик таможна беҗини 25 пирсәнткә өстүрүшни ойлишиватқанлиқини елан қилған. Иди хитай сода министирлиқи өткән җүмә күни трамп һөкүмитиниң юқириқи пиланиға қарита өч елиш тәдбирини қоллинип, 60 милярд долларлиқ америка мәһсулатиға қошумчә таможна беҗи қойидиғанлиқини билдүрди. Ройтерс агентлиқиниң хәвиридә қәйт қилишичә, “хәлқ гезити” ниң обзорида президент трампниң сода сияситиниң ақмайдиғанлиқини тәкитлигән болсиму, лекин 6-авғуст күни хитайниң шаңхәй аксийә базиридики пай чеки чүшүп, хәлқ пулиниң курси давамлиқ аҗизлиған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт