Amérika-xitay soda urushi keskinleshti, xitay taratquliri prézidént trampni tillashqa bashlidi

Muxbirimiz erkin
2018-08-06
Élxet
Pikir
Share
Print

Xitayning hökümet axbarati 6-awghust küni amérika prézidénti trampning soda siyasitini tenqidlep, uning shexsiyitige hujum qilishqa bashlidi. Chet'el axbarat wasitilirining ilgiri sürüshiche, bu amérika-xitay soda urushining téximu keskinlishiwatqanliqini, xitayning qattiq alaqzade boluwatqanliqini körsitidiken.

Xitay hökümiti prézidént trampning soda siyasitige qattiq narazi bolsimu, lékin xitay hökümiti hazirgha qeder xitay hökümet taratqulirini donald trampqa ochuq-ashkara hujum qilishtin tosup kelgen idi. Halbuki, xitayning bu taktikisi düshenbe, yeni 6-awghust künidin bashlap özgirishke bashlighan.

Xitay "Xelq géziti" ning xelq'ara basmisi 6-awghust küni obzor élan qilip, hujum nishanini prézidént trampqa qaratqan. "Xelq géziti" diki obzorda prézidént tramp "Kocha lükchekliri" ge oxshash heriket qilish bilen eyiplinip, uning xelq'ara sodini bir terepning paydisighila aylandurup qoyghanliqi tenqid qilin'ghan.

Roytérs agéntliqining xewiride bildürüshiche, "Xelq géziti" ning obzori prézidént trampning buningdin ikki kün awwal twittérda yazghan sözidin kéyin élan qilin'ghan. Prézidént tramp twittérda yazghan sözide özining xitay éksport mehsulatlirigha tamozhna béji qoyush istratégiyesining "Perez qilghandinmu yaxshi ünüm bergenliki" ni tekitligen. U bu uchurida yene béyjingning amérika bilen soda söhbiti ötküzüshni telep qiliwatqanliqini bildürgen idi.

Tramp hökümiti buning sel aldida xitayning 200 milyard dollarliq éksport mehsulatigha qoyulghan 10 pirsentlik tamozhna béjini 25 pirsentke östürüshni oylishiwatqanliqini élan qilghan. Idi xitay soda ministirliqi ötken jüme küni tramp hökümitining yuqiriqi pilanigha qarita öch élish tedbirini qollinip, 60 milyard dollarliq amérika mehsulatigha qoshumche tamozhna béji qoyidighanliqini bildürdi. Roytérs agéntliqining xewiride qeyt qilishiche, "Xelq géziti" ning obzorida prézidént trampning soda siyasitining aqmaydighanliqini tekitligen bolsimu, lékin 6-awghust küni xitayning shangxey aksiye baziridiki pay chéki chüshüp, xelq pulining kursi dawamliq ajizlighan.

Toluq bet