Президент трамп сода сөһбитидә хитай билән келишим һасил қилғанлиқини билдүрди

Мухбиримиз әркин
2019-12-13
Елхәт
Пикир
Share
Принт

Америка президенти доналд трамп 13‏-декабир җүмә күни баянат елан қилип, америка-хитай сода сөһбитиниң вақитлиқ келишим һасил қилғанлиқи, хитай експорт мәһсулатлириға қоюлидиған 160 милярд долларлиқ таможна беҗиниң бикар қилинғанлиқи, буниң америка-хитай сода сөһбитидә һасил қилинған вақитлиқ сода келишиминиң бир парчиси икәнликини елан қилди.

Мәлум болушичә, президент трамп йәнә15 пирсәнт таможна беҗи елиниватқан 112 милярд долларлиқ хитай импорт мәһсулатиниң беҗини 7. 5 Пирсәнткә чүшүридикән. Президент трамп тиветирда елан қилған баянатида буниң бәдилигә хитайниң зор миқдарда америка йеза-игилик вә санаәт мәһсулатлирини сетивалидиғанлиқини билдүргән. Лекин у буниң миқдарини тилға алмиған.

Бирләшмә агентлиқиниң хәвәр қилишичә, бейҗиңдики ахбарат йиғинида мухбирлар хитайниң 50 милярд долларлиқ америка йеза-игилик мәһсулатини сетивелишқа вәдә қилған-қилмиғанлиқини сориған, лекин хитайниң муавин малийә министири ляв мин бу суалға җаваб бәрмигән.

Сода келишими «уйғур кишилик һоқуқ қанун лайийәси» 3‏-декабир күни авам палатасида мақуллинип, кеңәш палатасида авазға қоюлушқа сунулған шундақла америкадики уйғурларниң «уйғур қанун лайиһәси» ниң кеңәш палатасида тезрәк авазға қоюлушини тәләп қилип, кеңәш палатасиниң көп санлиқлар рәһбири мич миконелға бесим ишлитиватқан һалқилиқ мәзгилдә һасил қилинған. Сода келишиминиң қанун лайиһәсигә қандақ тәсир көрситидиғанлиқи мәлум әмәс.

«Уйғур кишилик һоқуқ қанун лайиһәси» ниң авам палатасида мақуллиниши хитайни қаттиқ биарам қилған. Хитай дөләт ичи вә сиртида америкаға қарши кәң көләмлик тәшвиқат һәрикити қозғап, американи хитайниң уйғур районидики «террорлуқ» вә «әсәбийлик» кә қарши туруш һәрикитигә «қара чаплиди» дәп әйиблигән. 3 Милйондәк мусулман қамалған лагерларниң «кәспий тәрбийәләш мәркәзлири» икәнликини илгири сүргән иди. 

Бирләшмә агентлиқиниң хәвиридә тәкитлинишичә, гәрчә икки тәрәп вақитлиқ сода келишими һасил қилған болсиму, лекин икки тәрәп арисидики әң негилизлик мәсилиләр йәнила һәл болмиған. Президент трамп сода сөһбитиниң даваминиң «2020‏-йилдики сайламни күтүп турмай дәрһал башлинидиғанлиқи, буниң һәммәйлән үчүн қалтис бир келишим» икәнликини билдүргән.

Пикирләр (0)
Share
Толуқ бәт