Америка вә хитайниң ташқи ишлар әмәлдарлири вашингтонда көрүшкән

Вашингтондин мухбиримиз ирадә тәйярлиди
2024.05.30

30-Май пәйшәнбә күни, американиң муавин ташқи ишлар министири курт кампбел билән хитайниң муавин ташқи ишлар министири ма җавшу вашингтонда көрүшкән.

Ройтерс агентлиқиниң хәвәр қилишичә, америка ташқи ишлар министирлиқи бу һәқтики баянатида, “бу учришиш, америка-хитай мунасивитидики риқабәтни мәсулийәтчанлиқ билән идарә қилиш үчүн бир йилдин буян елип бериливатқан кәскин дипломатийәниң бир қисми, ” дәп көрсәткән.

Америка ташқи ишлар министирлиқиниң муавин баянатчиси ведант пател мухбирларни күтүвелиш йиғинидики сөзидә йәнә, “америка вә униң G7, явропа иттипақи вә шималий атлантик әһди тәшкилатиға әза болған шерик дөләтлириниң һәммиси хитайниң русийәни қоллишини ‛украинаниң бихәтәрликигә тәһдит болупла қалмай, бәлки йәнә явропаниң хәвпсизликигиму тәһдит, дегән қарашта икәнлики‚” ни билдүргән. У йәнә: “әгәр хитай русийәниң дөләт мудапиә санаитини қоллашни тохтатмиса, америка йәниму илгирилигән һалда тәдбир қоллинишқа тәйярлиниду” дегән.

Мәлум болушичә, хитайниң муавин ташқи ишлар министири ма җавшу 5-айниң 30-күнидин 6-айниң 2-күнигичә америкада зиярәттә болидикән.

Америка муавин ташқи ишлар министири курт кампбел хитайниң муавин ташқи ишлар министири билән болидиған бу учришишниң алдида қилған сөзидә, “хитайниң русийәни ярдәм билән тәминлиши, русийәниң йирақ мусапилик башқурулидиған бомба, зәмбирәк, учқучисиз айропилан вә из қоғлаш қатарлиқ һәрбий иқтидарлирини җанландурушиға пайдилиқ болуватиду” дегән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.