Америка бомбардиманчи айропиланлири хитайниң җәнубий деңиздики игилик һоқуқ тәлипигә етибар қилмиди

Мухбиримиз әркин
2017-07-07
Елхәт
Пикир
Share
Принт

Америкиниң икки истратегийилик бомбардиманчи айропилани пәйшәнбә күни хитай игилик һоқуқ даваси қиливатқан җәнубий деңиз һава бошлуқидин учуп өткән. Ройтерс агентлиқиниң җүмә күни бәргән хәвиридә қәйт қилишичә, америка бу арқилиқ хитайниң мәзкур райондики игилик һоқуқ тәлипини етирап қилмайдиғанлиқини ипадилигән.

Америка һава армийиси җүмә күни өзиниң гуам арилидики һәрбий базисида турушлуқ икки б-1б типлиқ бомбардиманчи айропиланиниң пәйшәнбә күни бу райондин учуп өткәнликини елан қилған. Америка бомбардиманчи айропиланлириниң, америка президенти доналд трамп билән хитай рәиси ши җинпиң германийәниң һамбург шәһиридә өткүзүлгән 20 дөләт гуруһиниң башлиқлар йиғини арисида өз-ара көрүшүшкә тәйярлиқ қиливатқан мәзгилдә учуп өтүши диққәт қозғиди.

Ройтерсниң билдүрүшичә, президент трамп шималий корейәниң ядро қораллар мәсилисидә хитайниң һәмкарлишишини үмид қилсиму, бирақ америка һечқачан өзлириниң җәнубий деңизда «әркин қатнаш һоқуқи» ни ипадиләштин тохтап қалмиған.

Хитай дөләт мудапиә министирлиқи җүмә күни америкиниң һәрикитигә ройтерс агентлиқи арқилиқ инкас қайтуруп, алақидар дөләтләрниң һәрбий һәрикитини һошярлиқ билән көзитиватқанлиқини билдүргән. Шу күни йәнә, хитай ташқи ишлар министирлиқи баянатчиси гең шуаң, «хитай бәзи дөләтләрниң деңиз қатнаш әркинлики дегән байрақни көтүрүвелип, һәрбий күчини көз-көз қилишиға, хитайниң игилик һоқуқи, бихәтәрликигә зиян селишиға қарши туриду» дегән. Хитай җәнубий деңизниң мутләқ көп қисмида игилик һоқуқи барлиқини илгири сүрүп, бу районда сүний аралларни ясиған вә униңға һәрбий әслиһәләрни орунлаштуруп кәлгән иди.

Пикирләр (0)
Share
Толуқ бәт