Amérika bombardimanchi ayropilanliri xitayning jenubiy déngizdiki igilik hoquq telipige étibar qilmidi

Muxbirimiz erkin
2017.07.07
Share on WhatsApp
Share on WhatsApp

Amérikining ikki istratégiyilik bombardimanchi ayropilani peyshenbe küni xitay igilik hoquq dawasi qiliwatqan jenubiy déngiz hawa boshluqidin uchup ötken. Roytérs agéntliqining jüme küni bergen xewiride qeyt qilishiche, amérika bu arqiliq xitayning mezkur rayondiki igilik hoquq telipini étirap qilmaydighanliqini ipadiligen.

Amérika hawa armiyisi jüme küni özining gu'am arilidiki herbiy bazisida turushluq ikki b-1b tipliq bombardimanchi ayropilanining peyshenbe küni bu rayondin uchup ötkenlikini élan qilghan. Amérika bombardimanchi ayropilanlirining, amérika prézidénti donald tramp bilen xitay re'isi shi jinping gérmaniyening hamburg shehiride ötküzülgen 20 dölet guruhining bashliqlar yighini arisida öz-ara körüshüshke teyyarliq qiliwatqan mezgilde uchup ötüshi diqqet qozghidi.

Roytérsning bildürüshiche, prézidént tramp shimaliy koréyening yadro qorallar mesiliside xitayning hemkarlishishini ümid qilsimu, biraq amérika héchqachan özlirining jenubiy déngizda “Erkin qatnash hoquqi” ni ipadileshtin toxtap qalmighan.

Xitay dölet mudapi'e ministirliqi jüme küni amérikining herikitige roytérs agéntliqi arqiliq inkas qayturup, alaqidar döletlerning herbiy herikitini hoshyarliq bilen közitiwatqanliqini bildürgen. Shu küni yene, xitay tashqi ishlar ministirliqi bayanatchisi géng shu'ang, “Xitay bezi döletlerning déngiz qatnash erkinliki dégen bayraqni kötürüwélip, herbiy küchini köz-köz qilishigha, xitayning igilik hoquqi, bixeterlikige ziyan sélishigha qarshi turidu” dégen. Xitay jenubiy déngizning mutleq köp qismida igilik hoquqi barliqini ilgiri sürüp, bu rayonda sün'iy arallarni yasighan we uninggha herbiy eslihelerni orunlashturup kelgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.