Amérika bilen yaponiye Uyghur élide ishlepchiqirilghan dora buyumlirini import qilmaqtiken

Amérika bilen yaponiye gerche xitayning mejburiy emgek mehsulatlirini import qilishni tosushqa tiriship kéliwatqan bolsimu, emma xitayning dora buyumliri buningdin mustesna bolup, buning ichide hetta Uyghur élidiki mejburiy emgekke chétishliq dora buyumlirimu mewjut iken.

“Yaponiye iqtisad xewerliri” torining 8-öktebir bergen xewiride éytilishiche, yer shari xewpsizlik orginiC4ADS 8-öktebir doklat élan qilip, amérika yémeklik we dora bashqurush idarisi (FDA) bilen yaponiye dora we dawalash üsküniliri idarisi (PMDA) ning Uyghur élige munasiwetlik ikki dora ishlepchiqarghuchigha ijazet bergenlikini ashkarilighan.

Mezkur doklatning aptori mishél köndi bu heqte toxtilip: “Xitay dunyadiki eng chong aktip dora matériyalliri ishlepchiqarghuchi, shundaqla dunyadiki ikkinchi chong dora baziridur, halbuki shinjang Uyghur aptonom rayonidiki dora buyumlirining pütün dunyagha tarqilish ehwali téxi chongqur tekshürülmidi” dégen.

Xewerde körsitilishiche, yaponiye dora we dawalash üsküniliri idarisi Uyghur élidiki tyenshen dorigerliki (天山药物) we yili chu'enning (伊利川宁) bi'otéxnika shirkitining ijazetnamisini testiqlighan.

C4ADS Hembehirligen soda sanliq melumatlirida körsitilishiche, yaponiye shirketliri 2023-yili yili chüenning shirkitidin wasitilik halda mehsulat sétiwalghan.

 Sanliq melumat we téxnika shirkiti bolghan qarun (Kharon) ning tekshürüshiche, yili chu'enning yene 2019-yildin 2023-yilghiche bolghan ariliqta hindistandiki dora teminligüchi shirket Unimax Chemicals qa 6 milyon dollar qimmitidiki antibiyotik éritromitsin mehsulatliri teminligen, andin bu shirket oxshash mezgilde yaponiye shirketlirige éritromitsin yötkigen.

Xewerde éytilishiche, yili chu'enning Uyghur élining “Namratliqtin qutuldurush pilani” we “Milletler ittipaqliqi pa'aliyiti” ge qatnashqan. Bu atalghularni hökümet mejburiy emgek pirogrammilirini medhiyeleshte qollinip kelgen. Tyenshen dorigerliki bolsa qismen rayonluq yerlik hökümetke tewe bolup, hökümet tereptin qoshulghan pay köp miqdarni igiligen.

Amérika hökümitining teminlesh zenjirige qarita tekshürüshidin ayan bolushiche, FDA arqiliq kontrol qilinidighan dorilarning %13 i xitaydiki zawutlarda ishlepchiqirilghan.

C4ADS Ning éytishiche, yaponiye shirketlirining Uyghur élidiki ikki orunni tizimgha aldurushi yaponiyening xitay hökümitining Uyghurlarni xorlash jinayitige bolghan inkasigha zit iken. Amérikaning bolsa, bu jehette yenimu aktip qedem élip, xitayning dora buyumliri sahesidiki mejburiy emgek amillirini tekshürüp chiqishi kérek iken.